मुख्यमंत्री न कायी नेताजी सुभाष चन्द्र बोस छात्रावास कु लोकार्पण अर बोलि नौनियाळ हमरू भवैष्य छन

देरादूण। मुख्यमंत्री न आज बनियावाळा प्र्रेमनगर मा नेताजी सुभाष चन्द्र बोस छात्रावास कु लोकार्पण कायी। एक मौका फर उन्न स्कुळया नौनियौं तैं स्कुळ क बर्दी अर नै साळ क बधै दे।

मुख्यमंत्री धामीन बोलि कि स्वास्थ्य अर सफै थैं बढ़ौंवा देंणा खूंणि सबि सरकारि स्कुळु मा पढ़ण वळि नौनियौं थैं स्कुळु मा सेनेट्री पैड दियें जाळा। जै खूंणि स्कुळु मा 50 हजार रुप्यौं कु कॉर्पस फण्ड बण्यें जाळु।

मुख्यमंत्री न सुभाष चन्द्र बोस छात्रावास बनियावाळा अर गदरपुर थैं उच्चीकरण करणा की अर कक्षा 9 अर 12 तककी स्कुळयां नौनियौं थैं निःशुल्क आवासीय सुविधा क जरिया शिक्षा दियें जाणा खूंणि चम्पावत मा नै नेताजी सुभाष चन्द्र बोस आवासीय छात्रावस बण्यें जाणा क घोषणा कायी।

मुख्यमंत्री धामी बोलि कि नै साळ कु मौका फर गरीब नौनियौं खूंणि ऐ आवासीय छात्रावास कु लोकार्पण कर्यें ग्यें। जै से उथैं पढ़ै करणा खूंणि अच्छु महौळ मिलळु। मुख्यमंत्री बतै कि प्रदेस मा 11 आवासीय छात्रावास छन, अर औरि बढ़यें जाणा खूंणि सरकार कोसिस करणि च।
मुख्यमंत्री न बोलि कि पढ़ै लिखै कैकि क्वीं भि देस तागतवर अर समृद्धशाळी बणि सकदु। उन्न बोलि कि देस आजादी कु अमृत महोत्सव मनौंणु च अर आणा वळा 25 साळ देस खूंणि बौत खास छन। मुख्यमंत्री न बोलि कि हमरा नौनियाळ हमरू भवैष्य छन अर नौनियाळ थैं अच्छी शिक्षा मिलण चैंद या खूंणि हम सब्यौं थैं खळाखळ प्रसास करण प्वाड़ळु।

ऐ मौका फर सचिव आर. मीनाक्षी सुंदरम, शिक्षा महानिदेशक बंशीधर तिवारी, जिलाधिकारी देरादूण श्रीमती सोनिका, मुख्य शिक्षा अधिकारी देहरादून डॉ. मुकुल कुमार सती अर शिक्षा विभाग क औरि अधिकारी छायीं।