नै साळ मा दर्वव्ळयों क ह्वै रौंस (मजा), चौबीस घण्टा खुळा राळा दारु क ठेक्का

देरादूण। नै साळ क मनौंणा वळों खूंणि रौंस हि रौंस (मजा) छन, एक तरफौं सरकार ब्वनि च कि नै सला मा घपरोल करण वळों फर नजर रख्यें जाली त दुसर तरफ सरकार न नै साळ मा मतंग करण वळौं खूंणि दारु कम न हूयां यांकु बन्दबस्त कै याळी।

सरकार न नै साळ से द्वी दिन पैळि 30 दिसम्बर 2022 बटि 2 जनवरी 2023 तक खूंणि प्रदेस मा होटळ, ढाबा, अर खाणा पिणा क दुकानियों अर दारू चौबीस घण्टा ख्वलण क मंजूरि दे द्यायी।

अपर सचिव सी रवि न यु आदेश जारी कै याळी अब नै साल क मतंग मा भैर बटि आण वळा पर्यटकु खूंणि शराबा क क्वीं कमि उत्तराखण्ड मा नी ह्वैळी। पर्यटन विभागान आबकारी विभाग थैं जारी निर्देश क अनुसार एफएल 6सी/7/7 सी अनुज्ञापनों थैं भि विभागा क अनुसार चलौंण खूंणि ब्वलें ग्यें। जैकु मतबल ह्वै कि जौ होटळु अर रेस्टोरेंट मा बार छन वु भि चौबीस घण्टा खुल्यां राला।

बतै दियां कि उन्न त शराबा क दुकनि थैं ख्वलणा कु बगत च पर नै साळ मा द्वी दिन इन्न नीं ह्वाळु, अब नै साळ मा द्वी दिन प्रदेस मा खाण-पिणा क दिकदरि क दगड़ मा दारू की क्वीं दिकदरि नीं ह्वैळी।
दर्वळयों क उमंग मा क्वीं कमि न हूयां या खूंणि सरकारन यु बन्दबस्त कायी। नै साळ मा दर्वळयों क रौंस हि रौंस छन।