विधानसभा मा नौकरि बटि भैर निकळयां कर्मचारियौंन विधानसभा क भैर कायी दिखौण (प्रदर्शन), ब्वाळ यु निसाब नीं च

देरादूण। विधानसभा मा नौकरि बटि भैर निकळयां कर्मचारियों न आज विधानसभा क भैर धरना दे अर सरकारक खिलाफ दिखौण (प्रदर्शन) कायीं। नौकरि बटि भैर कर्यां कर्मचारियौं क एक हि मांग छायीं कि केवल 2016 क बाद विधानसभा मा लग्यां कर्मचारियांे फर हि कारवै किलै। उंकु ब्वन छायीं कि अगर कारवै करणि च त सब्यौं फर हूंण चैंद।

सोमबार खंूणि विधानसभा क भैर विधानसभा मा 2016 बटि 2022 तक पिछनै क द्वार बटि नौकरि पर लग्यां 228 कर्मचारियौं न धरना दे अर दिखौण कायी। विधानसभा बटि भैर कर्यां कर्मचारियौं क एक हि मांग छायीं कि एक तरफौं करवै किलै। उन्न बोलि कि 2000 बटि विधानसभा मा इन्न भर्ति ह्वै, जन हमरि भर्ति ह्वै, पर 2016 से पैल्या क कर्मचारियों थैं नौकरि मा पक्कु कर्यें ग्यें। उन्न आरोप लग्यें कि 2016 क बाद विधानसभा मा नौकरि लग्यां कर्मचारियों थैं भैर करणु , विधानसभा अध्यक्षा क एक तरफौं कारवै च। उंकु बोलि कि 2016 से पैळि जतगा भि भर्ति विधानसभा मा ह्वीं सब्यौं फर कारवै हूंण चैंद।
उन्न बोलि कि 2016 से पैळि नेतौं क लग्यां ळोगु थैं बच्यें जाणु च जु कि पूरु निसाब नीं च।

दिखौण करण वळों कर्मचारियों न या मांग कायी कि उत्तराखण्ड बणाणा क बाद विधानसभा जगता भि भर्ति ह्वीं सब्यौं क जांच कर्ये ज्यां। उन्न विधानसभा अध्यक्ष फर आरोप लग्यें कि अपड़ा बुबा क बगत मा ह्वीं भर्ति मा लग्यां कर्मचारियों थैं बचौंणा खूंणि विधानसभा अध्यक्षा न 2016 क बाद विधानसभा मा नौकरि पर लग्यां कर्मचारियों थैं भैर कायी।