विजय दिवस फर मुख्यमंत्री न शहीदु थैं दे श्रद्धांजळि
देरादूण। मुख्यमंत्री धामीन आज सुक्वार खूंणि देरादूणा क गांधी पार्क मा विजय दिवसाक मौका फर शहीद स्मारक मा फुळ चढ़ै कि शहीदु थैं श्रद्धांजळि दे।
मुख्यमंत्रीन विजय दिवस फर भूतपूर्व सैनिकौं अर वीरांगनाओं थैं शॉल अर स्मृति चिन्ह् देकैकि सम्मानित कायी।
मुख्यमंत्रीन विजय दिवस फर घोषणा कायी कि प्रदेस मा शहीद द्वार व स्मारकु थैं बणौंणा कु काम अब सैनिक कल्याण विभाग कारळु। मुख्यमंत्रीन बोलि क जौ सैनिकु थैं वीरता चक्र मिल्यूं च ऊथैं अर वीर नारियों थैं अब उत्तराखण्ड परिवहन निगमाक बस मा जातरा करण फर पैंसा नीं दिंण प्वाड़ळा।
मुख्यमंत्री न विजय दिवस थैं भारताक सेना क वीर ज्वाुन क साहस, शौर्य अर पराक्रम कु दिन बतै अर बोलि कि आज क दिन 1971 मा पाकिस्तान क 93,000 हजार से जादा सिपै हमरा वीर सैनिकौं क समणि घुंडौं मा बैठिग्यें छायी।
मुख्यमंत्री न बोलि उत्तराखण्ड क भूमि देवभूमि क दगड़ा दगड़ि पराक्रम अर बलिदान क भूमि भि च। उन्न बोलि कि 1971 क लडै़ मा उत्तराखण्डा क 255 ज्वानु न भारत मां क रक्षा खूंणि अपड़ा प्राण दे दीं।
मुख्यमंत्री न बोलि कि मि भि एक फौजिक घौंर मा हि पैदा हूंयू छौ अर मिन फौजि क कुटुम्दरि क पिड़ा नजीक से दय्खयीं च।
मुख्यमंत्री न बोलि कि उत्तराखण्ड क विकासा खूंण राज्य सरकार क नीति हि ना बल्कि सरकार कु काम च अर हमन काम करण सौं लियीं च।
ऐ मौका फर कैबिनेट मंत्री प्रेमचंद्र अग्रवाल, मेयर सुनील उनियाल गामा, विधायक खजान दास, विधायक सविता कपूर, निदेशक सैनिक कल्याण (ब्रिगे.से.नि) अमृत लाल वखम छायीं।