पर्यटन, खेति पाति अर फळुका बग्वान पाड़ क तीक (रीढ़) छन : सतपाल महाराज

पौड़ी। पर्यटन, खेेति पाति अर फळुका बग्वान पाड़ क तीक छन। हमथैं ह्यूंद क मैनौं मा पर्यटन थैं अगनैं बढ़ौंणा क अर होम स्टे फर ध्यान देंणा क दरकार च। या बात प्रदेस क लोक निर्माण विभाग, पर्यटन, सिंचाई, लघु सिंचाई, संस्कृति, ग्रामीण निर्माण, पंचायतीराज, जलागम प्रबन्धन, बाढ़ नियंत्रण एवं भारत-नेपाल उत्तराखण्ड नदी परियोजनाएं मंत्री सतपाल महाराज आज पौड़ी मा बोलि।

सतपाल महाराजन आज पौड़ी विकास भवनाक सभागार मा सिचैं विभागाक बाढ़ नियंत्रण अर सुरक्षात्मक काम अर पंचैत राज विभागा क पंचैत भवन क 13 लाख 13 हजार रुप्यौं क हूंणि वळा कामु कु शिलान्यास करदा बोलि।

कैबिनेट मंत्री महाराजन ऐ मौका फर विभागु क अफसरु क दगड़ मा विभागाक समीक्षा बैठक उर्यें अर पाड़ क संस्कृति थैं अगनैं बढ़ौंणा, हयूंद क मैनौं मा पर्यटन, बग्वान, खेति पाति जन्न तोक मा औरि मैनत करणा क अधिकारियों थैं निर्देश दीं।

महाराजन पेयजल यौजनौं क बारा मा समीक्षा कायीं अर जल निगम अर जल संस्थान थैं बोलि कि द्वियों क कारण पाणि क गुणवत्ता मा क्वीं कमि नीं हूंण चैंद। जल जीवन मिशन मा रोजना एक आदिम थैं एक दिन मा 55 लीटर पाणि, 24 घण्टा मा देंणा क कोसिस हूंणि चैंद।

महाराजन पर्यटन , खेति पाति, अर फळुका बग्वान थैं पाड़ क तीक बतै अर बोलि कि हमथैं ह्यूंद क मैनौं मा पर्यटन थैं बढौंवा देंण चैंद। उन्न बोलि कि पाड़ मा घौर बणौंणदा हमथैं पाड़ क नक्काशी थैं अगनै बढ़ौंणा चैंद अर यीं पूरणि कला मा माहिर पूरण ळोगुक पछ्याण कैकि उ थैं घौर बणौंणा कु काम देंण चैंद।

सतपाल महाराजन उद्यान अर कृषि विभाग क समीक्षा कायी अर नै उत्पादु , नै पौध, नै बीजु क दगड़ पाड़ क अनाज अर दाळु थैं जादा से जादा पैदा करणा क बारा मा विचार करणा खूंणि बोलि। उन्न पॉलीहाउस, स्यारौं क दगड़ा-दगड़ि बुरांसा कु जूस, माळाबार, बांस थैं जगा जगा मा लगौंणा, रामदाणा, भट्ट, किन्वा जन्न पैदावार फर कौथिग उर्यें जाणा के दगड़ ‘ग्राम दिवस’ मनौंणा पर भि जोर द्यायी। महाराजन पाड़ मा उर्यें जाण वळा कौथिग थैं भि अगनैं बढ़ौंणा फर जोर द्यायी।

समीक्षा बैठक मा पौड़ी विधायक राजकुमार पोरी, जिला पंचायत अध्यक्ष शांति देवी, पुलिस अधीक्षक श्वेता चौबे, परियोजना निदेशक डीआरडीए संजीव कुमार राय, जिला विकास अधिकारी पुष्पेंद्र सिंह चौहान, अधीक्षण अभियंता जल संस्थान प्रवीन कुमार सैनी अर पेयजल संजय सिंह क दगड़ा मा जनपदा क अफसर अर ळोग छायीं।