निखट्टु कांग्रेस पार्टी छोड़िक जाणा छन, इन्न नेतौं थैं चळि जाण चैंद: करन माहरा

देरादूण। कांग्रेस भारत जोड़ा जातरा करणि च अर उत्तराखण्ड मा यांकु उल्टु हूंण च।

अबि कुछ दिन पैलि भाजपा क प्रदेश अध्यक्ष महेन्द्र भट्टा न बोलि छायीं कि कांग्रेस क 178 नेतौंक चिट्ठी भाजपा मा अयीं च अर वु कांग्रेस छोड़िक भाजपा मा आण चाणा छन। जैक बाद कांग्रेस प्रदेश अध्यक्षन बोलि कि कांग्रेस कु क्वीं नेता भाजपा मा नीं जाणु च। अर जु भाजपा मा जाणा छन वु नेता नलैक अर कैभि कामका नीं छन अर इन्न नेतौं थैं चळि जाण चैंद।

बतै दियां की कांग्रेसा क नेता अर कार्यकर्ता कांग्रेस छोड़िक भाजपा मा जाणा छन। कांग्रेस क प्रदेश अध्यक्ष थैं जब यांका बारा मा सवाल पुच्छेंग्यें त उन्न बोलि कि जु 10 साल बटि पार्टी मा कुछ नीं करणा छायीं, वु निखट्टु अगर पार्टी छोड़िक जाणा छन त या मा ऊंकी न कांग्रेस पार्टी क भलै च।

यांका दगड़ा दगड़ि उन्न बोलि कि कांग्रेस क बड़ा-बड़ा नेता कांग्रेस छोड़िक भाजपा मा ग्यें। आज वु भाजपा मा जैकि कि उक्ताणा छन, त इन्न मा जु अब जाणा छन उकुं क्या हाल ह्वोलु।

करन माहरा न बोलि न निखट्टु पार्टी छोड़िक जाणा छन यां से कांग्रेस थैं क्वीं फरक नीं प्वड़ दु अर न युंक जाणा से भाजपा थैं क्वीं फैद हूंणू वळु च।