विधायका कु सवाल स्थगित करणा फर विपक्ष नराज

देरादूण। उत्तराखण्ड ह्यूंद कु विधानसभा सत्र मा आज कारवै सुरु हूंदि हि कांग्रेसन कानून बदबस्त थैं लेकैकि नियम 310 क तहत चर्चा क मांग कायी।

सदना क कारवै मा हल्द्वानी बटि कांग्रेस क विधायक सुमित हृदयेश क सवाल थैं रव्कणा से विपक्ष नराज ह्वैग्यायी। सुमित हृदयेश न रिंग रोड़ मा बण्यें जाण वळि मुख्यमंत्री क घोषणा पर सवाल कै छायीं। जै फर सत्ता पक्ष न बोलि कि रिंग रोड एनएएचआइ क जरिया स बण्यें जाणि च। त वखि संजय डोभाल न वन प्रभाग मा ध्याड़ि फर काम करण वला मजूरों क मामलु थैं सदन मा उठ्यें अर बोलि कि साळु बटि काम करण वळा यूं मजूरों थैं बौत कम मजूरि मिलणि च, उन्न बोलि कि यु मजूरौं थैं पक्की नौकरि दियें जाण चैंद।

कांग्रेस विधायक अनुमपा रावत त राजाजी रिजर्व पार्क मा गुजरू क गौरू थैं चरणा कु अर डाळों थैं छ्टौंणा कु मंजूरी दियें जाणा कु मामलु उठ्यें।

विधायक प्रीतम सिंह पंवार न गढ़वाली, कुमौं अर जौनसरी बोलि क बारा मा सरकार से सवाल पूच्छि कि गढ़वाली, कुमौं अर जौनसरी बोलि थैं अगनै बढ़ौंणा खूंणि सरकारा क क्या त्यारि च? भाषा मंत्री सुबोध उनियाल गढ़वाली, कुमौं अर जौनसरी बोलि क बारा मा सदन मा जवाब दे, जैसे विपक्ष खुस नीं ह्वै।

प्रसाद योजना पर विधायक संजय डोभाल न धर्मस्व मंत्री से सवाल कायी। अर पूच्छि कि यमुनोत्री धाम मा प्रसाद योजना खूंणि कतग रुप्यौं कु बदबस्त करयूं च?

कांग्रेस विधायक प्रीतम सिंह न विशेषाधिकार हनन कु मुद्दा उठ्यें अर बोलि कि विधायकों कु विशेषाधिकार हनन थैं लेकैकि सरकार गम्भीर नीं च। नेता प्रतिपक्ष यशपाल आर्य न बोलि कि विधायकोंकु विशेषाधिकार हनन पर पीठ सरकार थैं निर्देश दे। जै फर संसदीय कार्य मंत्री न बोलि कि सदन सबि सदस्यु क सम्मान करदि। विधानसभा न बोलि कि हम पैळि पूरि जांच करला वैका बाद फैसला करला।