तागत दिखौंणा क लड़ै

जख कांग्रेस क राहुल गांधी भारत जोड़ा जातरा निकाळिक कांग्रेस पार्टी थैं हि ना बल्कि देस अर कांग्रेस थैं ज्वड़णा कु भि काम करणा छन। व वखि दूसर तरफ उत्तराखण्ड मा कांग्रेस पार्टी मा एक दूसर क टंगडौं थैं खिचींकि अपड़ि तागत दिखौंणा क लड़ै चलणि च।

अबि कुछ दिन पैळि कांग्रेस क प्रदेश अध्यक्षा न माणा बटि ‘भारत जोड़ो जातरा’ निकाळि। जातरा मा कांग्रेस कु एक गुट गैब छायीं।

जैका बाद कांग्रेस क दुसरु गुट भि झट जातरा निकलणा खूंणि त्यार ह्वैग्यें। त हरीश रावतन हरिद्वार मा ‘भारत जोड़ा जातरा’ निकालि। हरीश रातवक जातरा मा विधायक अनुपमा रावत, वीरेंद्र जाति, ममता राकेश, रवि बहादुर और राष्ट्रीय सचिव काजी निजामुद्दीन, वीरेंद्र रावत, सुधीर शांडिल्य, सुशील राठी के दगड़ मा सिरफ उत्तराखंड कांग्रेस अध्यक्ष करन माहरा, यशपाल आर्य हि बडु नौं छायीं। उन्न भि हरीश रावत क या ‘भारत जोड़ा जातरा’, हरीश रावत जिन्दाबाद अर हरद्वार जिन्दाबाद जातरा बणिग्यें।

दूसर तरफ कांग्रेस नेता प्रीतम सिंह न मैंग्यें अर बेराजगार जन मामलु मा सचिवायल कूच उर्यूं। प्रीतम सिंगा कु उर्यूं कूच मा प्रदेस कुणा-कुणा बटि कार्यकर्ता ढोल दमाऊ क दगड़ सचिवालय कूच खूंणि देरादूण मा एंय्या छायीं। सचिवालय कूच मा उमेद से जादा भीड़ छायीं, जैमा 14 विधायकों क दगड़ यशपाल आर्य, तिलक राज बेहड़, गोपाल राणा, मयूख महर, मदन सिंह बिष्ट, आदेश चौहान, सुमित हृदयेश ममता राकेश, फुरखान अहमद, वीरेंद्र जाती, रवि बहादुर, विक्रम सिंह नेगी ही न डॉ. हरक सिंह रावत, पैल्यक सांसद महेंद्र पाल, हीरा सिंह बिष्ट, दिनेश अग्रवाल, अर्येद्र शर्मा, विजयपाल सजवाण, कुमौं अर गढ़वाल क जिला अध्यक्षों क दगड़ दगड़ि कै पैल्यक पूर्व दर्जाधारी प्रीतम सिंह क दगड़ मा खड़ा छायीं। त वखि हरीश रावत, व पैल्यक कांग्रेस प्रदेस अध्यक्ष गणेश गोदियाल, अर कांग्रेस अध्यक्ष करन माहरा सचिवालय कूच मा कखि दूर-दूर तक नी दिख्येंणा छायीं।

ई वु कारण च जै से साफ हूंणू च बल कांग्रेस पार्टी क भितर सबि कुछ ठीक नीं च? कांग्रेस क भितर तागत दिखौंणा क जु लड़ै चलणि च वा लड़ै प्रीतम सिंह क सचिवालय कूच, हरीश रावत क ‘भारत जोड़ा जातरा’ से सब्यौं क समणि ऐग्यें।

हरीश रावत प्रदेसा क मुख्यमंत्री रैं, हरीश रावत कतगा तागतवर छन सबि जड़दा छन। वखि प्रीतम सिंह थैं अबि तक जौनसार कु नेता हि मन्यें जान्दु छायीं। इन्न मा सचिवालय कूच से साफ ह्वैग्यें की प्रीतम सिंह सिरफ अर सिरफ जौनसार कु नेता वलि अपड़ि पछ्याण से भैर औंणा क कोसिस मा छन। प्रीतम सिंगा क ऐ कूच न ऊंका विरोधियो ंथैं भि चटक (चौकन्ना) कै दे जु ब्याळी तक ऊथैं खतम मंनणा छायीं।

इन्न मा प्रीतम सिंगा कु सचिवालय कूच जख कांग्रेस खूंणि एकजुट ह्वै कैकि अपड़ि तागत दिखौंणा क अच्छी खबर च। वखि हरीश खेमा गुट खूंणि या बात झुरट पैदा करणि वलि च। इन्न मा बस अब या दय्खण वलि बात च कि या लड़ै आखिर अब क्या रंग जमान्द पर इतगा त साफ च कि कांग्रेस पार्टी क भितर तागत दिखौंणा क लड़ै चलणि च।