नगर निगम देरादूण बटि 6 फैल गैब

देरादूण। नगर निगम देरादूण क रिकॉर्ड बटि 6 फैल गैब ह्वैग्यीं, जै सै नगर निगम मा घपरोळ ह्वैग्यें। ऐ मामला मा नगर निगमा क भण्डारी राकेश पाण्डेन नगर कोतवाळि मा मुकदमा दर्ज कैरि याली। ऐ मामला मा नगर आयुक्त मनुज गोयल न बोलि कि जु फैळ गैब ह्वीं छन ऊंकी डिजिटल कौपी नगर निगम मा छैंच।

नगर निगमा कु भण्डारी राकेश पाण्डेन बतै कि छंचर खूंणि स्टोर बन्द कैकि घौर चलिग्यीं छायीं। आज सुबेर सोमबार खूंणि जब वु दप्तर मा ऐ त उन्न देखि कि स्टोरा कु ताळु टुट्यूं च। उन्न बोलि कि जब उन्न स्टोर मा देखि त 6 फैल स्टोर बटि गैब छायीं। उन्न बतै कि सबि फैल म्यूटेशन क छायीं।

बतै जाणु च चोर छत बटि भितर घुस्यां अर द्वार कु ताळु तोड़िक फैल लिग्यीं। इन्न मा अब बड़ु सवाल च कि नगर निगम क फैल मा इन्नु क्या छायीं कि चौरि ह्वैग्यें, आखिर च्वरू क मंसा क्या छायीं ?

वखि नगर निगम क अफसर ब्वना छन कि जु फैल चोरि ह्वै, वीं फैल कु डिजिटल कौपी नगर निगम मा छैंच। ऐ मामला मा नगर आयुक्त न पुलिस मा रिपोर्ट कै याली। पुलिस अब सीसीटीवी कैमरा दय्खणि च।