सतपाल महाराजन विधानसभा चौबट्टाखाल थैं दे 36 करोड़ रुप्यौं से बणाण वळि योजनों क भेंट

सतपुली। प्रदेस सरकार ह्यूंद क मैनों मा पर्यटन थैं अगनैं बढ़ौंणा क कोसिस करणि च। पर्यटन क तोक मा उत्तराखण्ड थैं टूरिज्म मा ईनाम मिळि, जु हम खूंणि गर्व क बात च। ऐसु क साल चारधाम जातरा मा 46 लाख से जादा जातरि जातरा मा अंया। या बात लोक निर्माण, पर्यटन, सिंचाई, पंचायतीराज, ग्रामीण निर्माण, जलागम, धर्मस्व एवं संस्कृति मंत्री और चौबट्टाखाला क विधायक सतपाल महाराज न राजकीय इंटर कॉलेज सतपुली अर रीठाखा मा उर्यूं कार्यक्रम मा बोलि।

सतपाल महाराज अपड़ि विधानसभा क तिन दिनकु दौरा फर उन्न 36 करोड़ रुप्यौं से बणाण वळि योजना क भेंट अपड़ि विधानसभा क रैवासियों थैं दे।

सतपाल महाराजन बोलि कि हमरि सरकार ह्यूंद क मैना मा पर्यटन थैं बढौंणा देंणा खूंणि उत्तराखण्ड क खाणा-पीणु क दगड़ा दगड़ि होमस्टे थैं अगनै बढ़़ाैंणा क कोसिस करणि च, जै से जादा से जादा पर्यटक उत्तराखण्ड मा ऐ सक्यां।

कैबिनेट मंत्री सतपाल महाराजन न 1282.45 लाख रुप्यौं क योजना क भेंट अपड़ि तोका क रैवासियों थैं दे। जै मा सतपुली मा 353.53 लाख रुप्यौं से बणाण वळि कार पार्किग अर 281.06 लाख रुप्यौं कु शॉपिंग कॉप्लेक्स अर सभागार कु शिलान्यास कायी। त वखि व्यास घाट मा 476.57 लाख रुप्यौं से बणण वळु 40 बिस्तरौं क पर्यटकौं खूंणि रैंणा जगा जन्नि योजनौं कु शिलान्यास भि कायी। उन्न रीठाखाल मा 62.63 लाख रुप्यौं क साइंस लैब आर्ट अर क्राफ्ट कक्षा कु भि शिलान्यास कायी।

ऐ मौका फर भाजपा युवा मोर्चा प्रदेश कार्यकारिणी सदस्य सुयश रावत, नव नियुक्त जिला अध्यक्ष सुषमा रावत, मण्डल अध्यक्ष बृजमोहन, सतपुली नगर पंचायत अध्यक्ष अंजना वर्मा, वेद प्रकाश वर्मा, बबीता रावत, एकेश्वर भाजपा मंडला क अध्यक्ष सत्यराज सिंह, विद्यालय क प्रधानाचार्य हेम चन्द्र केष्टवाल अर तोका क जनप्रतिनिधी, प्रधान, क्षेत्र पंचायत भाजपा क कार्यकर्ता छायीं।