मुख्यमंत्री धामी क सुरक्षा मा ह्वै बौत बड़ी चूक
देरादूण। मुख्यमंत्री पुष्कर सिंह धामी क सुरक्षा मा बौत बड़ी चूक ह्वै। जै कारण नेहरू कॉलोनी क एसएचओ मुकेश त्यागी थैं निलंबित कर्यें ग्यें।
मुख्यमंत्री थैं ब्याली दून विश्व विद्यालय मा इगास फर उर्यूं कार्यक्रम मा जाणु छायीं। नियमानुसार मुख्यमंत्री थैं जख भि जाण हूंद वख वैं थाणा थैं मुख्यमंत्री क गाड़ियों थैं एस्कॉर्ट करणा प्वड़दु।
बतै जाणु च मुख्यमंत्री क गाड़ियों क अगनै चलणि वळि थाणा नेहरू कॉलोनी गाड़ी मुख्यमंत्री थैं सीधा बाटु बटि नी लिगीं अर एक हि चौक फर मुख्यमंत्री क गाड़ियों थैं तीन बार घुमिग्यें। जै थैं मुख्यमंत्री क सुरक्षा मा बौत बड़ी चुक मन्यें ग्यें। जै कारण आज एसएसपी दलीप कुंवर न इंस्पेक्टर नेहरू कॉलोनी मुकेश त्यागी थैं निलंबित कै दें।