सेवायोजन अर कौशल विकास विभाग मा रोजगार कौथिग दुबरा-दुबरा उर्यें ज्यां : मुख्यमंत्री धामी
देरादूण। सचिवालय मा आज मुख्यमंत्री पुष्कर सिंह धामीन अधिकारियों क दगड़ मा बैठक कायी अर निर्देश दीं कि रोजगार अर स्वरोजगार खूंणि सेवायोजन अर कौशल विकास विभाग मा रोजगार कौथिग दुबरा दुबरा उर्यें ज्यां। जैमा औद्योगिक संगठन से भि मदत लियें ज्यां।
मुख्यमंत्री न प्रदेस मा नै भर्ति करणा खूंणि भि निर्देश दीं। उन्न बोलि कि सबि सचिव अपड़ा विभागु मा खाली प्वड़यां पदु क बारा मा एक हफता मा बत्यें दियां। जैमा कुल पद अर अबि कतग कर्मचारी काम करणा छन अर कतगा पद खाली छन सर्या जाणकारि हंूण चैंद।
मुख्यमंत्री न अधिकारियों थैं सखत निर्देश दी कि विभागु क फैळ शासन मा जादा नि रुकण चैंद।
मुख्यमंत्री धामीन बोलि कि योजनाओं फर विभाग अपड़ि तरफ बटि तेजी से काम कर्यां, या जिम्मेबरि भि विभाग अधिकारियों क च, जै खूंणि विभागु थैं अपड़ा काम करणा तरिकों मा बदलाव ल्याणा प्वाड़ळु।
बैठक मा अपर मुख्य सचिव श्रीमती राधा रतूड़ी, आनन्द वर्धन, प्रमुख सचिव आर. के. सुधांशु, डीजीपी अशोक कुमार, प्रमुख वन संरक्षक विनोद कुमार सिंघल, सचिव आर. मीनाक्षी सुंदरम, शैलेश बगोली अर औरि अधिकारी छायीं।