विधानसभा सत्र थैं लेकैकि विधानसभा अध्यक्षान कायी सबि दळु क दगड़ मा बैठक

देरादूण। ह्यूंद क मैनों मा विधानसभा कु सत्र कख अर कब होलु , ऐ बारा मा आज विधानसभा अध्यक्षा ऋतु खंडूड़ीन सबि दळु क दगड़ मा एक बैठक कायी।

बैठक मा विधानसभा अध्यक्षा न सबि दळु से विधानसभा सदन थैं सै ढ़ग अर टुप्प (शांन्तिपूर्वक) चलौंणा क विनीति कायी।

विधानसभा अध्यक्षा न बोलि प्रदेस क विकास अर जनता क भलै क बारा सदन मा चर्चा ह्वैळी। वु सत्ता अर विपक्ष क सबि सदस्यु थैं बराबर कु मौका देळि। उन्न बोलि कि 9 नवम्बर खूंणि गैरसैंण मा राज्य स्थापना दिवस मन्यें जालु।

विधानसभा अध्यक्षा ऋतु खंडूड़ी न बोलि कि उन्न सरकार क समिणि विधानसभा सत्र गैरसैंण या देरादूण मा कर्यें जाणा क बारा मा अपड़ि बात बोलि याली। अब यांकु फैसला सरकार फर च कि सरकार विधानसभा सत्र कख करान्द। उन्न बोलि कि विधानसभा देरादूण या भराड़ीसैंण विधानसभा मा कखि भि सत्र कराणा खूंणि त्यार च।

बैठक मा संसदीय कार्य मंत्री प्रेमचन्द्र अग्रवाल, नेता प्रतिपक्ष यशपाल आर्य, बहुजन समाज पार्टी से मो. शहजाद अर निर्दलीय विधायक संजय डोभाल छायीं।