लोक त्योवार “ईगास” फर प्रदेस मा ह्वैळी छुट्टी, मुख्यमंत्रीन का कायी घोषणा अर बोलि हमरि नै पीढ़ी अपड़ि लोक संस्कृति, अपड़ि पछ्याण, अपड़ा त्योवार से जुड़ी रयां

देरादूण। उत्तराखण्ड कु लोक त्योवार ईगास थैं लेकैकि मुख्यमंत्री छुट्टी क घोषणा कै। प्रदेस मा यु दुसरू दा ह्वै जब लोक त्योवार ईगास पर छुट्टी कर्यें ग्यें। यां से पैळि बि मुख्यमंत्री पुष्कर सिंह धामीन हि ईगास बग्वाल पर राज्य मा छुट्टी के कै छायीं। मुख्यमंत्री न बोलि कि ईगास प्रदेसाक रैवासियों खूंणि साख च। ईगास हमरि लोक संस्कृति हमरि पछ्याण च। उन्न बोलि हमथैं अपड़ि सांस्कृति, पछ्याण अर अपण्यांस थैं ज्यूंदु रखणा क कोसिस करण चैंद अर हमरि या कोसिस हूंण चैंद की हमरि नै पीढ़ी अपड़ि लोक संस्कृति, अपड़ि पछ्याण, अपड़ा त्योवार स जुड्यां रयां।

ऐ बातक जाणकारि मुख्यमंत्री अपड़ा ट्वीट फर दे। उन्न बोलि कि “आवा! हम सब्बि मिलके इगास मनोला नई पीढ़ी ते अपणी लोक संस्कृति से जुड़ोला। लोकपर्व ’इगास’ हमारु लोक संस्कृति कु प्रतीक च। ये पर्व तें और खास बनोण का वास्ता ये दिन हमारा राज्य मा छुट्टी रालि, ताकि हम सब्बि ये त्योहार तै अपणा कुटुंब, गौं मा धूमधाम से मने सको। हमारि नई पीढी भी हमारा पारंपरिक त्यौहारों से जुणि रौ, यु हमारु उद्देश्य च।