मुख्यमंत्री धामीन अनाथ नौन्याळु क दगड़ मन्यें दीवळी कु त्योवार

देरादूण। मुख्यमंत्री धामीन आज बग्वाल क दिन बद्रीपुर, देरादूण मा ‘अपना घर’ बाल महिला उत्थान समिति क उर्यूं कार्यक्रम मा भाग ल्यें। ऐ मौका फर मुख्यमंत्रीन सबि नौन्याळु थैं बग्वाल क बधै दे।

मुख्यमंत्री न ‘अपना घर’ मा रैंण वळा नौन्याळु क रैंण कु बन्दोबस्त थैं देखि। मुख्यमंत्री न ऊंकी बणईं चीजु थैंं देखि अर नौन्याळु खूंणि काम करण वळा बाल महिला उत्थान समिति क लोगुकि बौत बढ़ै कायी अर आभार बोलि।

ऐ मौका फर मुख्यमंत्री न नौन्याळु थैं मिठै भि दे। मुख्यमंत्री न बोलि कि आज नौन्याळु क दगड़ मा ऐ कि छ्वटमा क दिन समळौंण ह्वै ग्यें।

मुख्यमंत्री सबि नौन्याळु क भवैष्य बौत अच्छु हूंया यां कि भगवान से अरज कायी अर बोलि सरकार यु नौन्याळु क जतगा ह्वै साकळी मदत कारली।

ऐ मौका फर विधायक बृजभूषण गैराला अर सुरेश गड़िया भि छायीं।