हरक सिंह रावत कु न, ऊंक गलत कामु क विरोध च : दलीप रावत

देरादूण। लैंसडौन क विधायक दलीप सिंह रावत अर कांग्रेस क नेता हरक सिंह रावत द्विया एक दूसर थैं फुट्यां आंखा भि नि देखि सकदा। दलीप सिंह रावतन कै बार हरक सिंह पर कारवै करणा खूंणि सरकार थैं चिट्ठी लिखे अर जु विभागु मा हरक मंत्री छायीं ऊं विभागु कि सीबीआई जांच करणा के मांग तक कै छायीं। लेकिन अब दलीप सिंह रावत कुछ बदल्यां-बदल्यां लगणा छन खास कै कि हरक सिंह रावत थैं लेकैकि।

दलीप सिंह रावतन मीडिया मा ऐकि बोलि कि वु हरक सिंह रावत क विरोधी नी छन अर न हि उन्न कबि हरक सिंह रावत क खिलाफ सीधा जांच करणा क बात बोलि। उन्न बोलि कि मिन हरक सिंह रावतक जैै विभागु मा गड़बड़ ह्वै, वैकि जांच करणा क बाद बोलि छायीं। उन्न बोलि जै मामलों मा विवाद ह्वै अर सवाल खड़ा ह्वै, घपला करणा क आरोप लग्यां वै मामला मा जांच हूंण चैंद।

लैंसडौन का विधायक दलीप सिंह क अबि क छ्वीं बत्थौं न अबि त इन्न लगणु च कि दलीप सिंह रावतक आंखियां मा हरक सिंह रावत खूंणि माया कु पाणि ऐग्यें अर दलीप कुछ कुंगळा (नरम) ह्वैग्यीं।