बेतुका बयान फर बंधीधर भगत न मांगि माफी, बोलि भगवान थैं खुस करणा खूंणि घरया भाषा मा बोलि छै बात

हल्द्वानी। कालाढूंगी विधायक बंशीधर भगत न ब्याली अंतरराष्ट्रीय बालिका दिवस फर मा हल्द्वानी मा उरर्यू एक कार्यक्रम ब्वल्यां अपड़ा बयान पर आज माफी मांगि याली।

बंशीधर भगतन बयान क बारा मा बोलि कि म्यार ऐ बयानळ अगर कैथैं भि पिड़ा ह्वै त मि अपड़ा शब्द वापिस लिन्दु। उन्न बोलि कि मिन भगवान थैं खुस करणा खूंणि अर घरया भाषा मा या बात बोलि छै।

बतै दियां कि ब्याली अंतरराष्ट्रीय बालिका दिवस क मौका फर बंशीधर भगतन बोलि छायीं कि जब हमरि विद्या मंगणा क बारी आन्द त सरस्वती थैं पटावा, तागत चैन्द त दुर्गा थैं पटावा, अर पैंसा चैन्दन त लक्ष्मी थैं पटावा। जैका बाद बशीधर भगत पर चौछ्ड़ि हमला ह्वैग्यें छायीं।

बंशीधर भगत सदनि इन्न गपोड़ करणा क आदत च। अंतरराष्ट्रीय बालिका दिवस क मौका फर उन्न जु बात नौनियों क समणि बोलि वीं बात थैं सुणिक वखम बैट्ठयां ब्यटुळा अर नौनि क मुख सरमळ लाल हैग्यें छायीं। बंशीधर कु गुच्चु इतगा मा भि बन्द नीं ह्वै उन्न बोलि कि नौनि थैं सदिन सम्मान हूंद, पर नौनौं थैं भि सम्मान मिलण चैंद। उन्न बोलि एक आदिम भगवान शिव च, जो हिमालय जैकि जड्डु मा बैट्ठयु च अर जैक मुण्ड मा गुरौं बैट्ठयुं च अर मत्थी पाणि ब्वागणु च। त वखि भगवान विष्णु समौद्र मा छुप्यां च, बेचरौं क दगड़ मा क्वीं बात भि नीं हूंदि। बंशीधर क ईं बातिक चौछ़ड़ि छ्वीं हूंणि छन।

बतै दियां बल बशीधर भगत सदनि अपड़ा इन्न छ्वींळ सदनि विवादु मा रैंन्दन जै कारण ऊंकी पार्टी क खुब किरकिरी हूंणि रैंन्द। ब्याली बटि एकदा दुबरा बंशीधर भगत क चौछ़ड़ि छ्वीं हूंणि छन। जैका बाद आज बंशीघर भगत न ब्याली ब्वलि अपड़ि बात थैं वापिस ल्यें अर माफी मांगि याली।