सबि कर्मचारी अपड़ि जिम्मेबरि थैं समझिक, ईमानदारीळ काम कर्यां: विधानसभा अध्यक्ष

देरादूण। उत्तराखण्ड विधानसभा मा सबि कर्मचारी अपड़ि जिम्मेबरि थैं समझिक, अपड्यांस अर ईमानदारिळ काम कर्यां। उत्तराखण्ड विधानसभा थैं देस मा एक आर्दश विधानसभा बणौंणा खूंणि सबि कर्मचारियों थैं पेशेवर तरीकळ काम करणा क दरकार च। या बात आज विधानसभा अध्यक्ष ऋतु खंडूड़ी भूषण न विधानसभा मा एक बैठक मा बोलि।

ऐ मौका फर विधानसभा अध्यक्षान अनुभाग क अधिकारियों से ऊंका विभागु क कामु क बारा मा जाणकारी भि ल्यें अर निजी सचिव से समितियों क बारामा जाणकारी भि ल्यें।

विधानसभा अध्यक्षान बोलि बल समितियों क बैठक लगातार हूंण चैंदन। उन्न बोलि यांक बारा मा बौत जल्दी हि सभापतियों के दगड़ मा एक बैठक ह्वैळी।

विधानसभा अध्यक्षान बोलि बल वु राजनीति से मत्थी उट्ठि कैकि उत्तराखण्ड अर समाज के सेवा करण चाणि च। उन्न बोलि कि वु विधानसभा मा बन्दोबस्त कैन कैकि अच्छु ह्वै सकदन यां फर तेजी से काम करणि च। उन्न बोलि कि उत्तराखण्ड क विधानसभा मा ई ऑफिस , ई -विधानसभा, ई- लाइब्रेरी बण्यें जाली।