विधानसभा मा पक्का हूयां कर्मचारियों पर गिच्चू बन्द किलै च विधानसभा अध्यक्षा कु: प्रीतम सिंह

देरादूण। कांग्रेस के नेता प्रीतम सिंह न विधानसभा मा 2016 अर 2022 मा भर्ति हूंया कर्मचारियों क नौकरि खतम करणा फर सवाल खड़ा करिन। उन्न बोलि कि जब जांच समिति न या बात साफ कैरि याली कि राज्य बणणा क बाद से आज तक विधानसभा मा ह्वीं सबि भर्ति गलत छन त करवै मा भेदभाव किलै करयें जाणु च। उन्न बोलि कि पक्का हूयां कर्मचारियों पर विधानसभा अध्यक्ष क गिच्चु बन्द किलै च।

प्रीतम सिंहन बोलि कि पक्कु हूंणा क मतलब यौं नीं च कि गलत तरीकोंळ भर्ति हूंया पर कारवै नि ह्वै सकदन। अर इन्न च त सरकार 2015 मा ह्वीं दरोगा भर्ति क विजिलेंस जांच किलै करणि च। उन्न बोलि कि 2015 मा भर्ति हूंया दरोगा त सबि पक्का छन। उन्न बोलि बल विजिलेंस जांच मा गड़बडि ह्वैळी त क्या सरकार ऊ फर कारवै करली। उन्न बोलि 2004 मा ह्वीं दरोगा भर्ति मा पक्का हूंया दरोगों क नौकरि थैं खतम कर्यें ग्यें छायी। उन्न बोलि कि इन्न मा 2016 से पैळि पिछनै क द्वार बटि भर्ति हूंया कर्मचारियों पर कारवै किलै नीं करयें जै कसदन। उन्न बोलि कि इन्न मा त सवाल विधानसभा अध्यक्ष पर भि खड़ा हूंदन।

प्रीतम सिंहन बोलि कि गलत तरीकन भर्ति हूंया कर्मचारियों क पक्का हूंण क मतलब यौं नि च कि ऊथैं नौकरि बटि निकले नीं जै सदकु। उन्न बोलि कि गलत तरीकोंन नौकरि पर लग्यां कर्मचारी पक्का ह्वै जंदन तब भि ऊंक नौकरि खतम करणा क नियम छन। ऐ मामला मा कैकि विविध सलाह लिंणा के क्वीं दरकार नीं च।

प्रीतम सिंह न बोलि कि विधानसभा क मामला मा विधानसभा अध्यक्षन अद्धा न्याय कायी।