विधानसभा मा भैर वळों थैं नौकरि देंणा क मामला मा यूकेडी न कायी खबरदार
देरादूण। उत्तराखण्ड क्रांति दलक केन्द्रीय मीडिया प्रभारी शिव प्रसाद सेमवालन आज विधानसभा अध्यक्ष ऋतु खण्डूड़ी अर ऊंका बुबा भुवन चन्द्र खंडूड़ी क विधानसभा मा करि पिछनै क द्वार बटि भर्ति थैं लेकैकि खूब हो हल्ला कायी।
यूकेडी शिवप्रसाद सेवमालन बोलि बल खंडूड़ी कुटमदरि बोट खूंणि कोटद्वार अर यमकेश्वर क रैवासियों मा जान्द अर नौकरि खूंणि नेपाल, बिहार, दिल्ली अर यूपी क अपड़ा खास लोक्खु थैं कुर्सी मा बैट्ठान्द। उन्न विधानसभा अध्यक्षा थैं एक हफ्ता कु बगत दे अर बोलि विधानसभा मा पिछनै क द्वार बटि जगता भि भर्ति ह्वीं छन उथैं खतम करें ज्यां।
शिवप्रसाद सेमवालन बोलि बल ऋतु खण्डूड़ी पर कुछ खास जांच करणा कु आरोप भि लग्यें अर बोलि राज्य बणाणा क बाद अबि तक विधानसभा मा जगता भि भर्ति ह्वीं सबि भर्तियों थैं खतम कर्यें जाण चैंद। उन्न बोलि कि ऋतु खण्डूडी अपड़ा बुबा भुवन चन्द्र खण्डुड़ी अर प्रकाश पंत, हरबंश कपूरा क बगत मा ह्वीं भर्तियों थैं छुपाण चाणि च।
शिवप्रसाद सेमवालन कागज दिख्येकि पैल्यक मुख्यमंत्री भुवन चन्द्र खण्डूड़ीन पर यु आरोप लग्यें कि उन्न नेपाळि द्वी मनखि कु उत्तराखण्ड कु नकली रैवासि प्रमाण पत्र अर नकली मार्कशीट बण्यें कि इमत्यान मा पास करें अर नौकरि फर लग्यें। उन्न द्वीया भर्तियों थैं भि खतम करणा क मांग कायी। उन्न बोलि कि भुवन चन्द्र खण्डूडी न अपड़ा घौर मा काम करण वला भुरत्यों थैं नकली कागजु क जरिया नौकरि पर लग्यें अर यांक बाद अपड़ा घौर मा हि काम पर लग्यें दे।
प्रेस वार्ता मा यूकेडी के प्रवक्ता शांति प्रसाद भट्टन खबरदार कैरि अर बोलि यु सबि भर्ति खतम नि कर्यें जालि त भुवन चन्द्र खण्डूडी फर नकली कागज बणौंण कु मुकदमा दर्ज कर्यें जालु।
यूकेडी महिला मोर्चा क केन्द्रीय अध्यक्ष सुलोचना ईष्टवाल न बोलि कि जांच कमेटी न बगत से 10 दिन पैळि अपड़ि जांच रिपोर्ट दे द्यायी। उन्न आरोप लग्यें कि जु नकली कागजु पर नौकरि लग्यां छन अर न जु पैंसा देकि नौकरि फर लग्यां छन ऊंकी जांच कर्ये ग्यें।
यूकेडी महिला मोर्चा केन्द्रीय उपाध्यक्ष उत्तरा पंत न बोलि कि विधानसभा मा नौकरि करण वलों थें बिना बत्यां निकलें ग्यें।
प्रेसवार्ता मा यूकेडी क मुख्य प्रवक्ता शांति प्रसाद भट्ट, केंद्रीय महिला मोर्चा क अध्यक्ष सुलोचना ईष्टवाल, उपाध्यक्ष उत्तरा पंत बहुगुणा, अर राजेंद्र सिंह गुसाईं छायीं।