अंकिता कु कतल, ज्यूं थैं पिड़ा देंण वलु : त्रिवेन्द्र सिंह रावत

देरादूण। पैल्यक मुख्यमंत्री त्रिवेन्द्र सिंह रावतन अंकिता कतल थैं दुर्भाग्यपूर्ण बतै अर बोलि या घटना ज्यूं थैं पिड़ा देंण वलि च।

त्रिवेन्द्र न रिजॉट मालिक पर भि सवाल खड़ा करिन। उन्न बोलि बल रिजॉट चलौंण वलों क मंशा हि गलत छायीं अर अंकिता थैं रिजॉट मा रखण भि गलत हि छायीं। उन्न बोलि कि नौनि क दगड़ मा जु कुछ ह्वै सर्या देस क मनखि जाणि ग्यें। इन्न घटना दूबरा ना हूंया या खूंणि हमथैं भवैष्य मा एक नै व्यवस्था बणाण प्वाड़लि।

उन्न बोलि हम सब्यां चान्दौं कि नौनि भि रोजगार खूंणि घौर बटि भैर निकलयां। पर दूसरि तरफ इन्न घटना हूंणि छन्न कि जै सै नौनियों क अगनै बढ़णा क कोसिस अर दिमाग मा गलत असर प्वड़णु च।

त्रिवेन्द्र सिंह रावतन रिजॉट मा बुलडोजर चलाण फर भि सवाल खड़ा करिन। उन्न बोलि कि जिला प्रशासान बतै कि हमसे या का बारा मा क्वीं मंजूरि नि ल्येग्यें। इन्न मा सवाल यौं च बल आखिर बुलडोजर कैन चलें? यु जांच कु विषय च।

त्रिवेन्द्र सिंह रावतन बोलि रिजॉट चलौंणा खूंणि नियम बण्या छन पर नियमु कु क्वीं पालन नि करदु।
उन्न बोलि बल अबरि राजनीति करणा कु मौका नि च यु बगत चिंता कु च।