विधानसभा अध्यक्षा न मुख्यमंत्री थैं लेखि चिट्ठी, राजस्व पुलिस व्यवस्था थैं खतम करणा क कायी मांग
देरादूण। अंकिता भण्डारी क कतल फर विधानसभा अध्यक्षा न दुख जतै अर बोलि कि यांकु हम सब्यौं थैं बौत दुख च। विधानसभा अध्यक्षा न बोलि प्रदेस सरकार अर मि नौनि क कुटमदरि क दगड़ मा छौ। उन्न बोलि जु दोषि छन ऊं थैं सजा जरुर मिळालि।
विधानसभा अध्यक्षा न बोलि कि अब यु स्वचण प्वाड़ळु कि राजस्व पुलिसक हमथैं कतगा दरकार च। अर क्या राजस्व पुलिस थैं पुलिस क अधिकार दियें जाण चैंदन। उन्न बोलि कि रिजॉर्ट क जांच खंूणि हमथैं कटगुडु फैसळा लिंण प्वाड़ळा।
ऐ बारा मा विधानसभा अध्यक्षान राजस्व पुलिस व्यवस्था थैं खतम कैकि पुलिस थाना अर चौकी ख्वलणा क बारा मा मुख्यमंत्री धामी थैं चिट्ठी लेखि। अर ऐ बारा मा झट से आदेश देंणा क विनती कायी।