विधानसभा मा पिछनै क द्वार बटि ह्वीं भर्ति खतम हूंण चैंदन
देरादूण। उत्तराखण्ड विधानसभा मा पिछनै द्वार बटि ह्वीं भर्ति मा मामला मा मुख्यमंत्री पुष्कर सिंह धामीन बोलि विधानसभा मा जु भि भर्ति नियम तोड़िक ह्वीं छन ऊंथैं खतम करै जाणा चैंद अर जौन भि या भर्ति कैरि, ऊं पर कारवै हूंण चैंद। मुख्यमंत्री न बोलि जन्नि ऊंथै ऐ बारा मा पता चलि, ऊं न झट विधानसभा अध्यक्ष ऋतु खंडुडी थैं ऐ मामला मा जांच करणा क आदेश दीं।
मुख्यमंत्री न बोलि ऐ मामला मा उन्न सुरू बटि यु साफ कै याली छायीं कि विधानसभा मा जु भि भर्ति गलत तरौं से ह्वीं छन ऊंथैं खतम करै जाणा चैंद अर जु ऐ मामला मा दोषि छन वु फर कारवै हूंण चैंद।
बतै दियां ऐ मामला मा कैबिनेट मंत्री प्रेमचन्द्र अग्रवाल न विधानसभा अध्यक्ष क पद रैन्द विधानसभा मा चुपचाप भर्ति कै छायीं। जै फर सरकार चौछ्वड़ी विपक्ष क निसाणा पर च।
ऐ मामला विधानसभा अध्यक्षा न एक जांच समिति बण्यें याली। अब जांच समिति से या उमैद कर्यें जाणी च कि जल्दी हि ऐ मामला मा जांच कैकि रिपोर्ट विधानसभा अध्यक्षा थैं दे देली।