नै-नै मुल्ला कु गंगजाट

पिरान कलियर मा लोगु क आस्था च अर कुछ लोग ऐकी साख पर बट्टा लगौंणा कु काम करणा छन। पिरान कलियर मा नशा, अर देह व्यापार जन काम हूंणि क बात समणि आणि रैदन। इन्न ब्वन च उत्तराखण्ड वक्फ बोर्ड क नै नै बण्यां अध्यक्ष शादाब शम्स कु। शाबाद शम्स जु बयान पिरान कलियर थैं लेकैकि देंणा छन कि यख नशा कु कारौबार अर देह व्यापार जन काम हूंदन। या बात बौत दिकदारि क च, अर देवभूमि खूंणि स्वचण वळि भि, आखिर देवभूमि मा यू क्या हूंण च?

यखम सवाल यौं भि च कि क्या यु सब उत्तराखण्ड क वक्फ बोर्ड क पैल्यक अध्यक्ष थैं पता नि छायीं, या ईं बातिकु जाणकारि सरकार थैं नीं छायीं? शाबाद शम्स या बात बौत अच्छी तरौं जण्दन कि उत्तराखण्ड देवभूमि च अर पिरान कलियर मा भि हजारों मनखियों क आस्था जुड़ि च। इन्न मा शाबाद शम्स जू ब्वना छन वै मा जरा भि सचै च त पिरान कलियर खूंणि खतरनाक त देवभूमि शरम क बात च।

अब बडु सवाल यौं च अगर पिरान कलियर मा इन्न हूंण च यांकु दोष कैकु च? आखिर जु शाबाद शम्स ब्वना छन वा कैकि कमी च, अर इन्न अनैतिक कामु थैं रवक्णा कु जिम्मेबरि कैकि च अर कैकु काम च?

सवाल त शाबाद शम्स पर भि छन बल शाबाद शम्स थैं या सबि बात अध्यक्ष क कुर्सी मा बैट्ठी की हि पता चलि। साफ च बल शाबाद शम्ब जु ब्वना छन अगर बात सबि सच छन, त वु या बात पैळि बटि जणदा छायीं। पिछळ पांच साल बटि प्रदेस मा भाजपा क सरकार च, अर शाबाद शम्स अपड़ा गौळा मा भाजपा कु प्रवक्ता कु तगमा लगे कि भाजपा क नौंणि स्पौंणा छायीं।

इन्न मा तब क्या ऊंकी कुईं जिम्मेबरि नि बणदि छायीं कि पैळि ईं बात क बारा मा अपिड़ सकरार तैं बतौंदा। आज शाबाद शम्स क ‘बेगुनाह दगड़ छेड़ि नीं, अर, गुनहगार थैं छ्वड़न नीं च’, जन्न बत्था जुमलेबाजी नी त औरि क्या च।

हरद्वार मा पंचायत चुनौं छन इन्न मा साफ च पिरान कलियर पर या बात सिरफ बोट क राजनीति च अर खास जाति क मनखियों थैं बोट कु फैद देंणा खूंणि ब्वलें ग्यें।

‘जाणदु नि च बिछी क मंत्र, अर गुरौं क द्वलणा डाल्दु हत्थ, नै-नै मुल्ला बण्यां शाबाद शम्स न भि इन्नि करि। चौछ्ड़ि छ्वींक बरखा क्या ह्वीं ऊंकी गंगजाट क गुब्बरे क हवा निकळि ग्यें। अर ब्वन प्वाड़ कि म्यार ब्वन कु गलत मतलब निकलें ग्यें। अब शाबाद शम्स लाख घुुंडु टक्यां या अपडु मुण्ड भुंय्यां मा रग्ड़यांँ प्रदेसक रैवासियों ऊथैं कतै माफ नि कारला।

शाबाद शम्स न पिरान कलियार पर बयान सुदि-मुदि नीं द्यायी। उत्तराखण्ड वक्फ बोर्ड क नै-नै मुल्ला बण्यां शाबाद शम्सन हाईकमान क समणि अपड़ा नम्बर बणाणा खूंणि दे। अबि न इन्न हि लगणु च कि शाबाद शम्स न अपड़ु धरम हि ना बल देवभूमि कु ठट्टा लगौंणा कु काम कायी औरि कुछ न।