मुख्यमंत्री धामीन ‘उत्तराखण्ड राज्य सीनियर बैडमिंटन प्रतियोगिता’ थैं कायी सुरु, बैडमिंटन खेलिक बच्चों कु उत्साह भि बढ़ै
देरादूण। मुख्यमंत्री पुष्कर सिंह धामीन आज बहुउद्देशीय क्रीडा भवन परेड ग्राउंड देरादूण मा उत्तरांचल राज्य बैडमिंटन एसोसिएशन क उर्यूं ‘उत्तराखण्ड राज्य सीनियर बैडमिंटन प्रतियोगिता’ थैं सुरु कायी।
मुख्यमंत्री धामीन सब्यां ख्यलण वळों बच्चों थैं भविष्य क शुभकामनाएं दे। अर बोलि कि बच्चा खेलक हर क्षेत्र मा बौत अच्छु करणा छन। प्रदेस क खिलाड़ी देस हि न विदेस मा भि अपडु राज्य अर देसकु नौ थैं रोशन करणा छन। उन्न बोलि कि खिलाड़ी क सफलता से क्षेत्राक रैवासी, राज्य क रैवासी अर देस क भावना भि जुड़ी रैन्दन, हजारू मनखियों कु आशीर्वाद ऊंका दगड़ मा हूंद अर एक खिलाड़ी थैं देखिक दूसर खिलाड़ी भि अगनै आणा क बारा मा स्वच्दन।
मुख्यमंत्री न बोलि बल आज भारत सर्या विश्वा मा एक लीडर क रूप मा अगनै बढ़णु च। हम आज अमृतकाल मा पौंचि ग्यां। एक अमृत काल मा भारत अर प्रदेसक रैवासियों थैं अगनै बढ़िक अपड़ि जिम्मेबरि थैं समझिक देस क प्रति अपड़ु सहयोग देंण प्वाड़ळु। उन्न बोलि बल हमन नै राज्य खेल नीति बण्यें याली। अर बगत-बगत फर खिलाड़ियों क जरुरत थैं देखिक खेल नीति मा सुधार भि कर्यें जाला।
ऐ मौका फर मुख्यमंत्रीन बैडमिंटन खेलिक बच्चांें कु उत्साह भि बढ़ै।
ऐ मौका फर यू.एस.बी.ए अध्यक्ष श्रीमती अलकनंदा अशोक, सचिव बी.एस मनकोटी, डी.के सेन, हरीश जोशी, राकेश डोभाल अर चेतन गुरूंग वखम छायीं।