मुख्यमंत्री धामीन कायी अग्निपथ योजना क सुरुआत

कोटद्वार। मुख्यमंत्री पुष्कर सिंह धामीन आज बुधवार खूंणि पौड़ी जिला क कोटद्वार बटि अग्निपथ योजना क सुरुआत कायी। ऐ मौका फर कोटद्वार क विधायक अर विधानसभा अध्यक्ष ऋतु खंडुडी, पौड़ी विधायक राजकुमार, सैनिक कल्याण बोर्ड मंत्री गणेश जोशी, लैंसडाउन क विधायक दलीप सिंह रावत, यमकेश्वर विधायक रेनू बिष्ट छायी।

कोटद्वार मा मुख्यमंत्री धामीन कु भाजपा कार्यकर्ताओं न ढोल बज्यें कु स्वागत कायी। याका बाद मुख्यमंत्री धामीन मॉडन मोटेसरी स्कुळ मा अग्निपथ योजना थैं सुरू कायी। बतै दियां बल 19 अगस्त बटि गढ़वाल मण्डल क 7 जिळों मा अग्निवीर भर्ती सुरू ह्वै जाली। कोटद्वारा मा भर्ती गब्बर सिंह कैंप मा ह्वैळी।

भर्ती खूंणि गढ़वाळ रैफल न सब्या त्यारि पूरी कैरि याली।

भर्ती खूंणि गढ़वाल मंडलाक 7 जिलों बटि कुल 63,360 अभ्यर्थियोन पंजीकरण कायी। जैमा चमोली क 9306, देरादूण क 9148, हरिद्वार क 6812, पौड़ी गढ़वाल क 16330, रुद्रप्रयाग क 6357, टिहरी गढ़वाल क 9784, उत्तरकाशी क 5623 अभ्यर्थियोंन भर्ती हूंणा खूंणि अपड़ा नौ लिख्यें।