मुख्यमंत्रीन उत्तराखण्ड मा पैदा हूंया आम, शहद अर राजमा थैं विदेसी बजार मा भज्यण वळि गाड़ियों थैं हारू झण्डा दिख्यें

मुख्यमंत्री पुष्कर सिंह धामीन मुख्यमंत्री कैम्प कार्यालय मा एपिडा क जरिया उत्तराखण्ड मा हूंण वळा आम, शहद अर राजमा थैं विदेसी बाजार मा भज्यण वळि गाड़ियों थैं हारू झण्डा दिखें।

ऐ मौका फर 1.5 टन आम, 28 टन राजमा अर 80 टन शहद थैं बाजार मा भेज्यें ग्यें।

मुख्यमंत्री धामीन बोलि कि एपिडाळ विदेसी बजार मा उत्तराखण्ड बटि जु पैदावार भेजि या खूंणि वैकी बढ़ै हूंणि चैंद। उन्न या आस कायीं कि आणा वलु बगत मा उत्तराखण्ड क औरि पैदावार थैं भि विदेसी भैज्यें जालु। उन्न बोलि कि विदेसी बजार मा यू पैदावरी क बौत अच्छु मोल (कीमत) मिल्यां या खूंणि सरकार लगातार प्रयास करणि च। मुख्यमंत्री बोलि बल त्यार पैदावार क ब्रांडिंग, पैकेजिंग अर मार्केटिंग मा खास ध्यान देंण चैंद। उन बोलि कि प्रदेस क पैदावार थैं जादा से जादा बढ़ावा मिल्यां या खूंणि हमथैं जादा कोसिस करणा क जरुरत च।

उत्तराखण्ड क छवट्टा जिमदारु क कमै बढ़ौंणा खूंणि कलस्टर क विकास सहकारिता , कृषि अर उद्यान विभाग क बीच मा बौत कोसिस हूंण छन।
मुख्यमंत्री न बोलि कि बजटक पैळि खेती बाड़ी क हुनरमंदु क दगड़ मा बात कर्यें ग्यें छायीं।

मुख्यमंत्री न बोलि कि प्रधानमंत्री न जिमदारु क कमै थैं द्वीगुणा करणा कि जु सौं लिईं च, वीं साैं थैं पूरु करणा खूंणि राज्य सरकार अपड़ि पूरि कोसिस करणि च।

मुख्यमंत्रीन बोलि बल केन्द्र अर राज्य सरकार क खेतीबाड़ी क भलै खूंणि चलणि योजनौं थैं प्रदेस क सबि रैवासियों तक पौंच्यें जाणु च। 2025 उत्तराखण्ड राज्य स्थापना दिवस क रजत जयंती मानळु तब तक जिमदारु क कमै बढ़ाणा खूंणि कृषि, उद्यान, सिचैं अर औरि विभाग पॉयलट प्रोजेक्ट क तरौं काम करणा छन जै फर खास ध्यान दियें जाणु च।

मुख्यमंत्री बोलि बल रजत जयंती साल मा सबि विभागु थैं कुछ इन्न काम करणा प्वाड़ळा जु देस अर हिमालयी प्रदेसु खूंणि एक मिसाल हुय्यां। मुख्यमंत्री न बोलि कि राज्य मा जल्दी जिमदारु खूंणि प्रोस्साहन योजना बण्यें जाली।

कृषि मंत्री गणेश जोशीन बोलि कि प्रधानमंत्री मोदी अर मुख्यमंत्री क मार्गदर्शन मा राज्य सरकार जिमदारु क कमै थैं द्वीगुणा करणा खूंणि बौत योजना चलाणि च।

सचिव कृषि शैलेष बगोली न बोलि कि राज्य मा हूंणि वळि पैदावार थैं अगनै ल्याणा क दगड़ा अर सै बाजार मा मिल्यां ऐ बारा मा लगातार कोसिस हूंणि च।

उन्न बतै कि प्रदेक जिमदारु न पैळि बार यख पैदा हूय्यां चौंसा अर लंगड़ा आमु थैं दुबई भेजि अर शहद, राजमा थैं संयुक्त राज्य अमेरिका मा भज्यें ग्यायी।

ऐ मौका मा अपर सचिव कृषि रणवीर सिंह चौहान, निदेशक उद्यान डॉ. एच. एस. बवेजा, निदेशक कृषि गौरी शंकर, एपिडा के रीजनल हेड डॉ. सी.बी.सिंह, कृषि अर उद्यान विभाग क अधिकारी मौजूद छायीं।