यूकेएसएसएससी पेपर लीक मामला मा, पुलिसन पकड़ि द्वी औरि आरोपी

देरादूण। यूकेएसएसएससी पेपर लीक मामला मा एसटीएफ न द्वी औरि आरोपियों थैं पकड़ि। द्वियां आरोपी यूनिवर्सिटी मा नौकरि करणा छायीं। पकड़यां आरोपियों मा एकन इमत्यान भि दें अर इमत्यान मा पास भि ह्वैग्यें। अर दूसरन औरि बच्चों क इमत्यान क त्यारि कर्यें यांक दगड़ मा वैन मास्टरमाइंड थैं 36 लाख रुप्या भि दीं।

एसटीएफ क एसएसपी अजय सिंह न बतै कि लखनऊ बटि पेपर लीक मामला मा अब तक 9 लोगु पकड़ें ग्यीं। पकड़यां आरोपियों क बताणा फर पुलिसन दीपक चौहान, भन्सवाडी टिहरी गढ़वाल अबि बालावाला देरादूण मा रैंणा अर भावेश जगूड़ी, जोगत पट्टी-दिचली उत्तरकाशी अबि विद्या विहार कारगी मा रैंण वला थैं भि पकड़ि याली।

द्वियों न पुलिस थैं बतै कि एचएनबी मेडिकल यूनिवर्सिटी मा प्रशासनिक कार्यालय मा उपनल बटि कनिष्ठ सहायक क पद पर काम करणा छन। ऊंकी ऐ मामला मा मास्टर माइंड जयजीत दास जू कि आर.एम.एस. टैक्नो सोल्यूशन कम्पनी मा नौकरि करदु वै से पछ्याण छायीं। जयजीत कु मेडिकल यूनिवर्सिटी मा आणु जाणु रैंदु छायी। जयजीत न दीपक थैं पेपर दे छायीं। पेपर क कीमत 36 लाख रुप्या दीपकन हि जयजीत थैं दें छायी।

दीपक अर भावेश जगूड़ी द्विया दगड़ मा हि नौकरि करदा छायीं। दीपक न हि भावेश थैं पेपर मिलण क बात बतै। जैका बाद द्वियों न परीक्षा मा शामिल बच्चों थैं एक जगा मा बुल्यें अर परीक्षा मा आण वला सवाळु थैं बतै। भावेश जगूड़ी न भि इमत्यान दें। पुलिस अब दीपक अर भावेश जगूड़ी के मोबाइल नम्बरू क जांच करणि च अर औरि सबुत जुटौंण मा लग्यीं च। पुळिसन द्वियां थैं न्यायिक हिरासत मा भेजि याली।

एसटीएफ न ऐ मामला मा अबि त 7 आरोपियों थैं पकड़ि छायीं। जैमा आउटसोर्स कम्पनी क कम्प्यूटर प्रोगामर मास्टमांइड छायीं, जै न पेपर लीक करणा के 60 लाख रुप्या लीं।

ऐ काम म आयोग बटि निकलयां पीआरडी क कर्मचारी, कोचिंग सेंटर कु डायरेक्टर शामिल छायीं। जै कि पछ्याण अल्मोडा क मनोज जोशी नौनु बालकिशन जोशी जू पैलि पीआरडी कु कर्मचारी अर आयोग मा काम करणु छायीं।
देरादूणाक रैंण वला जयजीत दास नौनु विमल दास, पण्डितवाड़ी थाना कैण्ट आउटसोर्स कंपनी मा कंम्प्यूटर प्रोगामर मास्टरमाइंड , मनोज जोशी ग्राम पाटी जिला चम्पावत, कुलवीर सिंह चौहान चांदपुर बिजनौर कोंचिग सेंटर संचालक, शूरवीर सिंह चौहान कालसी देहरादून, गौरव नेगी नजीमाबाद किच्छा ऊधमसिंह नगर शामिल छायीं।