मुख्यमंत्रीन बैटरी से चलण वळि 5 नै बसु थैं हारू झण्डा दिख्ये
देरादूण। मुख्यमंत्री न आज रेंजस कॉलेज ग्राउंड मा नगर निगम के उर्यूं वृक्षारोपण कार्यक्रम मा भाग ल्यें। ऐ मौका फर मुख्यमंत्री न एक डाळु लग्यें। मुख्यमंत्रीन आईएसबीटी बटि जौलीग्रांट एयरपोर्ट अर आईएसबीटी बटि सहस्त्रधारा तक बैटरी से चलण वळि 5 नै बसु थैं हारू झण्डा भि दिख्यें।
मुख्यमंत्री न बोलि कि प्रदेस मा 16 जुलै बटि 15 अगस्त तक डाळा लग्यें जाणा छन। उन्न बोलि कि डाळा लगौंणा मा ज्वान नौना जन उमंगळ भाग लिंणा छन, देरादूण थैं साफ अर हारू बणाणा खूंणि इन्नि ताकत अर उमंग काम ऐळी।
मुख्यमंत्री न बोलि कि हमरा पूरणों न हमथैं साफ वातावरण पैळि बटि दियूं च, इन्न हमरि अपड़ि आण वळि पीढ़ी थैं बि मिलण चैंद। यां खूंणि पर्यावरण थैं बणौंण क हम संब्यौं क जिमेबरि च। उन्न बोलि कि विकास अर प्राकृतिक क पलडा़ बराबर रैय्यां यां खूंणि पर्यावरण अर पाणि बचौंणा क बारा मा काम करणु बौत जरूरी च।
मुख्यमंत्री न बोलि कि पिछळ साळ हरेला पर मिन मिलण वळों से बोळि छायी कि फुळ ल्याण जगा मा एक डाळु लेकैकि अयां। उन्न बोलि क स्मार्ट सिटी मा बैटरी से चलण वळि 5 नै बस इकोनामी अर इकोलॉजी थैं बराबर करणा क उदाहरण छन। उन्न बोलि कि बसु क चलण से जातरियों थैं सुविधा ह्वैळी, त दूसर तरफ देरादूण थैं साफ शहर बणाणा कु संकल्प भि अगनै बड़ळु।
कैबिनेट मंत्री प्रेमचन्द्र अग्रवालन बोलि कि हमथैं डाळा लगौंणा हि न बल्कि वुथैं बचौंणा के जिमेबरि भि लिंण चैंद। उन्न बोलि कि हमथैं अपड़ा जन्मबार, ब्याैं मा एक डाळु लगौंण चैंद।
मयेर सुनील उनियाल गामा न बोलि कि हरेला त्वार पर नगर निगम 100 वाडु मा डाळा लगाळु अर ऊंकी देखभाल भि कारलु। उन्न बोलि कि स्वच्छ अर सुंदर दून कु संकल्प क दगड़ा-दगड़ि देरादूण मा प्लास्टिक थैं पूरू तरौं खतम करैं जाळु।
ऐ मौका फर विधायक खजान दास, सविता कपूर, महानगर अध्यक्ष भाजपा सीताराम भट्ट, गढ़वाल कमिश्नर सुशील कुमार, जिलाधिकारी सोनिका, वरिष्ठ पुलिस अधीक्षक दिलीप सिंह कुंवर, नगर आयुक्त देहरादून मनुज गोयल अर औरि लोग छायीं।