गमला थैं चुटांणा क सजा, नौन्याळु क मुण्ड मा लीसु डाळिक दें
एक खबर सोशल मीडिया मा वायरल हूंणि च। वीडियो मा बच्चा अपड़ा मुण्ड मा लीसु डलणा छन।
वीडिया अल्मोड़ा के ग्राम पंचायत टिटरी व गौ गुरना, तहसील स्यालदे कु च।
बतै जाणु च बल कुछ बच्चों बोण मा गौर चरौंण खूंणि ज्यां छायीं। जख बच्चों न डाळों पर लग्यां लीसोंक गमलों थैं डाळों फर बटि निकालिक चुल्लें (फेंक दियें) दें। बस ईं बातिल रूस्यां लीसा क ठेकदारन अर ठेकदारक नेपळि भुरत्योंन यू बच्चों थैं लासों क गमला थैं चुल्यांणक सजा दें। सजा इन्न कि सूंणि मनख्यात भि अपड़ु मुुख थैं शर्मळ लुकाणि च।
ठेकदार छवट्टा छवट्टा बच्चों थैं एक लैन का खडु़ कैकि पैलि ऊं से पुछदुं कि तील कतगा गमला चुल्यें अर तब ऊं से ऊंका बुबा क नौ पूछि। अर सजा क तौर पर मुण्ड मा लीसु डलणा खूंणि बोलि। जैका बाद मा ठेकदार ब्वलणु च कि जिन्दगि भर याद रालु।
अब यखम सवाल उठाणा छन कि छवट्टा छवट्टा बच्चों क मुण्ड मा लीसा डळण से पैळि ठेकदार अर नेपळि भुरत्योंन क एक बार बि इन्न नि सोचि यां से बच्चों क मुख, लटुला अर खास कैकि आंखा खराब ह्वै सकदन।
वीडियो क सोशल मीडिया मा वायरल हूंण से प्रदेस क रैवासी नराज छन अर ठेकदार अर ठेकदारक नेपळि भुरत्योंन पर कारवै करणा क मांग करणा छन।