मास्टर जी कु कुईं अता पता नि, स्कुळिक भैर बैट्ठयां छन नौन्याल

नैनीताल। प्रदेस मा शिक्षा क क्या गत (हालत) छन सब्यां जणदा छन। स्कुळु क इन्न गत कु एक वीडियो सोशल मीडिया मा वायरल हूंण च। वीडियो नैनीताल क ओखलकांडा ब्लॉक कु राजकीय प्राथमिक विद्यालय कुमल्टा डालकन्या कु च। वीडियो मा स्कुलक छ्वट्टा छ्वट्टा नौन्याल स्कुल क भैर बैट्ठिक गेट ख्वलणा कु इंतजार करणा छन लेकिन मास्टरसाहब छन कि 8 बजि तक स्कुळिम नि पौंचि।

मास्टर क आठ बजि तक स्कुल मा नि आण से ठरठरों हूंया नौन्यालु क ब्वे बुबा न एक वीडियो बण्यें अर सोशल मीडिया मा डाळि दें।

स्कुल खुलण बगत सात बजि कु च, नौन्याल सात बजि बटि स्कुल मा लैन लग्यें कि खड़ा हूंया छन पर साढ़े आठ बजि तक तिन्यां मास्टरूम बटि एक भि मास्टर स्कुल मा नि पौंचि।

इन्न मा समझें जै सकदु बल मोटी-मोटी तनखा लिंण वला मास्टरू थैं हमर नौन्यालु क भवैष्य क कतगा परवा च।