मुख्यमंत्री धामीन न हरेला लोक त्योवार फर लग्यें डाळु अर बोलि बल पर्यावरण थैं बचौंणा क जिम्मेबरि हम सब्यौं क च

देरादूण। मुख्यमंत्री पुष्कर सिंह धामीन आज छंचर (शनिवार) खूंणि हरेला लोक त्योवार फर महाराणा प्रताप स्पोर्ट्स कॉलेज क नजीक वन विभाग कु उर्र्यू कार्यक्रम मा भाग लें। ऐ मौका फर मुख्यमंत्री न डाळु लग्यें अर हरेला लोक त्योवार मन्यें। मुख्यमंत्रीन प्रदेस क रैवासियों थैं हमरि सांस्कृतिक पछ्याण हरेला लोक त्योवार क बधै दें।

मुख्यमंत्री धामीन बोलि बल हरेला क ऐ त्योवार फर प्रदेस मा एक मैना तक डाळा लगौंणा कु काम कर्यें जालु। उन्न बोलि कि पर्यावरण थैं बचौंणा खूंणि सदनि कोसिस करणा क दरकार च।

उन्न बोलि कि सब्यां जिलों मा हमरा पाणि क धार, पन्देरों अर गाड़, गदेरों थैं दुबर से ज्यूंद अर उथैं बचौंणा खूंणि काम करणा क दरकार (जरूरत) च। गदनों थैं बचाणा अर ऊथैं दुबरा ज्यूंद करणा क थीम पर ऐसु के साल हरेला लोक त्योवार थैं मन्यें जाणु च। उन्न बोलि कि विकास अर पर्यावरण क पलड़ा सदनि बराबर हूंण जरुरी च। जै से हमरि अपणि आणा वलि पीढ़ी थैं साफ पर्यावरण मिल्यां। या हम सब्यौं क जिम्मेबरि च।

मुख्यमंत्री न बोलि कि देवभूमि उत्तराखण्ड धर्म, अध्यात्म अर संस्कृति से जुड़ी च। यखकि बिगरैलि (खुबसूरत) डांडी-कांठी मनखियों थैं बौत भलि लगदन। ऐ वास्ता यूं थैं बचौंणा क हमरि जिम्मेबरि औरि भि बढ़ जान्द। हम सब्यौं थैं मिलकैकि प्रकृति थैं बचौंणा क दिसा मा अगनै आण प्वाड़ळु।

वन मंत्री सुबोध उनियाल न हरेला त्योवार प्रदेस क रैवासियों थैं बधै दें। उन्न बोलि कि हरेला हमरि सांस्कृतिक पछ्याण च। उन्न बोलि कि डाळों अर प्रकृति थैं बचौंण से हम साफ पाणि, हवा अर बोण का फैदा ले सकदन। उन्न बोलि लि डाळों थैं बचाणा क जिम्मेबरि प्रदेस के सब्यां मनखियों क च। खास कैकि उन्न ज्वानु से डाळा लगौंण मा जादा से जादा अपड़ि भागीदारी देंणा खूंणि बोलि। उन्न बोलि कि हरेला मा 15 लाख डाळा लग्यें जाला। जै मा 50 प्रतिशत डाळा फल्ळु क ह्वाला।

ऐ मौका फर मेयर सुनील उनियाल गामा, विधायक उमेश शर्मा काऊ, प्रमुख सचिव वन आर.के. सुधांशु, प्रमुख वन संरक्षक विनोद कुमार सिंघल, गढ़वाल कमिश्नर सुशील कुमार, जिलाधिकारी देहरादून डॉ. आर राजेश कुमार अर वन विभाग क अधिकारी छायीं।