गणेश गोदियाल न मुख्यमंत्री से कायी अप्फु पर लग्यां आरोपु क हाईकोर्ट क जज से जांच करणा क मांग

UK Dinmaan

गणेश गोदियालन आज बदरीनाथ केदारनाथ मंदिर समिति मा अपड़ा कार्यकाल मा हूयां घपला पर सहकारिता मंत्री डॉ धन सिंह रावत क खिलाफ हमला बोलि।

आज सुक्वार खूंणि कांग्रेस क पैल्यक अध्यक्ष गणेश गोदियालन राजीव भवन मा प्रेस कायी। गोदियालन बोलि कि बीकेटीसी सदस्य आशुतोष डिमरी क ऊं पर लग्यां आरोपु थैं नकारि दें।

गणेश गोदियालन बोलि कि डॉ धन सिंह रावतन ऊंका खिलाफ यू खेल खेलि। गणेश गोदियाल न मुख्यमंत्री धामी से अप्फु पर लग्यां आरोपु क हाईकोर्ट क जज से जांच करणा क मांग कायी। अर बोलि कि एक हफ्ता क भितर कर्वै नि ह्वै त गणेश गोदियाल मुख्यमंत्री के घौर के भैर बैट्ठलु।

गणेश गोदियालन बोलि कि सहकारिता मंत्री डॉ. धन सिंह रावत भि भ्रष्टाचार क आरोप मा घिर्यां छन। सहकारिता मा भर्ति , स्वास्थ्य विभाग मा नर्सिग मानक मा बदलि करैकि करोड़ो रुप्यों क घपला करणा क आरोप ऊं पर लग्यां छन। अब अगर धन सिंह रावत सै छन त मेरि तरौ उथैं भि अपड़ि जांच करणा क मांग करण चैंद।

उन्न बोलि कि मि जब बीकेटीसी कु अध्यक्ष छायीं तब औरि सब्यां सदस्य भाजपा सरकार बटि नामित छायीं। मिळ सब्यां काम नियमानुसार हि करीं। मि अप्फु पर लग्यां आरोपु कु स्वागत करदू पर जांच निष्पक्ष हूंण चैंद।

प्रेस कांफ्रेंस मा कांग्रेस के अध्यक्ष करन माहरा, पैल्यक मुख्यमंत्री हरीश रावत अर पार्टी क पदाधिकारी छायी।