कांग्रेस सरकार क बगत बदरी-केदार मंदिर समिति मा ह्वै घपला, गणेश गोदियाल क मुण्ड मा यांकु ठिकरू

देरादूण। कांग्रेस बगत मा बदरी केदार नाथ मंदिर समिति मा घपला ह्वै। यांकी सिकैत मंदिर समिति के सदस आशुतोष डिमरी न कायी। आुशतोष डिमरी न प्रभारी मंत्री डॉ. धन सिंह रावत थैं एक चिट्ठी लेखि जैमा उन्न कांग्रेस क बगत मा मंदिर समिति मा रूप्यों के घपला कु ठिकरो गणेश गोदियाल क मुण्ड मा धैरि।

उन्न लेखि कि साल 2012 बटि 2017 मा बदरीनाथ केदारनाथ मंदिर समिति क अध्यक्ष गणेश गोदियाल छायीं, वे बगत मंदिर मा रूप्यों क घपला ह्वै।

उन्न बोलि कि श्री बदरीनाथ, श्री केदानाथ जी मंदिर सर्या देस मा आस्था के केन्द्र च। उन्न बोलि कि जब गणेश गोदियाल अध्यक्ष पद मा छायीं तब उन्न अर ऊंका दगड़ियों न मिलिक मंदिर समिति क नियमुक खिलाफ काम कायीं। जै से मंदिर समिति मा रूप्यों क नुकसान ह्वै।

उन्न बोलि कि मंदिर समिति क पैसोंळ साल 2015 मा प्रताप नगर टिहरी मा 7 लाख रूप्यां खरच कैकि सड़क बण्यें दें।

साल 2014 मा दिल्ली क कम्पनी बटि 12-15 लाख रूप्यों क बदरीनाथ जातरा पर वीडियो क कैसेट खरीदी। कैसेट बदरीनाथ काउन्टर पर बय्चणा खंूणि धैर ग्यें। लेकिन कैसेट क पैसों थैं, कैसेट बिकण से पैळि हि कैसेट बणाण वला थैं दियेें ग्यीं। जू कि मन्दिर अधिनियम 1939 कु उल्लंघन च।

यांक दगड़ा दगड़ि उन्न लेखि कि वै वगत उन्न बिना कै थैं पूच्छां बौत सर्या भर्ती क करवै दीं। चिट्ठी मा उन्न बदरीनाथ जी के प्रसाद मा लड्डू बणाणा मा घपला करणा के ठिकरू भि उंकै मण्ड मा फोड़ि। उन्न लेखिकि ंमंदिर के प्रसाद मा चौलैयक (चौलाई) लड्डू बणौंण खूंणि बिना निविदाकु काम श्रीनगर एक कारोबारी थैं यू काम दियें ग्यें।

मन्दिर समिति मा भर्ति अर पद मा बढौत्तरी करणाकु भि घपला करेग्यें। उन्न लिखे कि 2014 बटि 2016 तक कतगा हि कर्मियों थैं नियम क खिलाफ नौकरी पर धर्यें ग्यें। जबकि शासनल केवल एक तय वेतन मा नौकरी पर धर्ये जाणा खूंणि ब्वलु छायीं।

आुशतोष डिमरी न 2012 बटि 2017 क बीच मा भगवान बदरीनाथ एवं केदारनाथ क खजाना मा डाका डल्यें ग्यें, यांका सबुत समणि छन। ये घपला क बारा मा जांच हूंण चैंद।

ऐ बारा मा गणेश गोदियालन बोलि कि मिथैं जांच सै कुई डैर नि च। पांच साल पैलि भि या जांच ह्वै छायीं। उन्न बोलि कि मि फर लग्यां आरोपु कु जांच अर सहकारिता विभाग मा हूंया घपला क जांच रिटायर्ड जज या विधानसभा समिति बण्यें कि करैं ज्यां।