राजधानी देरादूणा कु पाणि नि च पींण लैक

राजधानी देरादूणा कु पाणि पींण लैक नि च। या बात हमन बल स्पेक्स संस्था क पाणि क गुणवत्ता रिपोर्ट मा ह्वै। संस्था क वैज्ञानिक अर स्वयं सेवियोंन देरादूण मा अलग-अलग जगा बटि पाणि के 97 नमूना जमा कैकि जांच कायी जैमा 92 नमूना फेळ ह्वैग्यीं।

या मा खास बात या च कि प्रदेस के रैवासियों क घौर मा हि न बल्कि प्रदेस क नेता अर अफसर क घौर कु पाणि भि पेंण लैक नि च। पाणि मा कखि क्लोरीन क मात्रा जादा त कखि शरैल थैं नुकसान पौंचाण वळा तत्व पाणि मा जादा छन।

संस्था क सचिव डॉ. बृजमोहन न देरादूण क प्रेस क्लब मा उर्ईं प्रेस वार्ता मा जल गुणवत्ता क या रिपोर्ट जारी कायी। उन्न बतै कि स्पेक्स संस्था न मई अर जून क मैना मा नगर निगमाक 70 जगों अर बस्तियों मा बटि पींणा क पाणि क नमूनांे थैं बट्टोरिक उंकी जांच कायी। कुल जमा 97 जगा बटि पाणि के नमूनों लिऐग्यीं। जैमा 92 नमूनों मा पाणी पींण लैक नि छायी। कखि क्लोरिन जादा क कखि कम छायी।

उन्न बतै बल सचिवालय, जिलाधिकारी क घार, कैबिनेट मंत्री सतपाल महाराज अर गणेश जोशी, विधायक खजानदास अर विनोद चमोली क घौर बटि भि पाणि के नमूना लिए ग्यीं। जादा स जादा पाणि क नमूना फेल ह्वैग्यीं। उन्न बोलि क साफ च बल प्रदेस क बड़ा नेता अर अफसरू के घौर मा जू पाणि आणु च वू पींण लैक नि च।

इंदर रोड, कैनाल रोड मा सप्लाई हूंण पाणी मा क्लोरीन मानक से जादा छायीं। डॉ शर्मा न बोलि कि खराब पाणी हमरा शरैळ थैं कै तरौं का नुकसान करदू। उन्न बोलि कि ई जल गुणवत्ता क रिपोर्ट थैं शासन अर प्रशासन अर विभाग थैं भि भेजें जालु। जै से देरादूण क पाणि थैं पींण लैक बण्यें जै सक्यां।