अग्नि पथ पर प्रदेस मा घमाचूर (धमासान) मच्यूं च

देरादूण। अग्निपथ योजना थैं लेकैकि प्रदेस मा घमाचूर (घमासान) मच्यूं च ज्वान (युवा) सड़क्यिों मा छन अर घपरोल करणा छन अर पुलिस सड़क्यिों मा डण्डा चलाणि च। व दूसरि तरफ भाजपा अर कांग्रेस एक दूसरा पर आरोप लग्यें कि राजनीति करणि च। सर्या उत्तराखण्ड मा अग्निपक्ष क मुच्छयाळक आग लग्यिं च।

ब्याळी बटि प्रदेस मा लग्यिं आग मा आज दूसर दिन हल्द्वानी मा अग्निपक्ष क विरोध मा ज्वानु न नैनीताल हाईव थैं रोकि द्यायी। वाटा रोकिक सड़कि मा बैट्ठया ज्वानु कि पुलिस न लांठुळ पिटै कायी। जैमा बौत नौना घैल ह्वै ग्यीं। पुलिसळ ज्वानु थैं गिरफतार भि कायी।

ऐ बारा मा एसडीएम मनीष कुमार बोलि कि हमन कै कि भि पिठै नि कायी त दूसर तरफ या एसपी क्राइम न ब्वाल कि सड़क्यिों मा जाम लग्यूं छायी जै थैं ख्वलणा खंूणि हमथैं डंडा चलौण प्वाड़।

खबर च कि बौत बड़ि संख्या मा ज्वान सड़क्यिों मा छायी अर केन्द्र सरकारक खिलाफ नारा बाजी करणा छायी। ऊंकु ब्वलण छायी कि हमथैं 4 साळ क नौकरि नि चैंणि च, द्वी साळ बटि फौज मा भर्ती नि ह्वै, हम भर्ती त्यारि करणा छौ, अब हमरि भर्ती क उमर भि जादा हूंणि च, भर्ती खूंणि हमन फिजिकल अर मेडिकल टेस्ट दियां छायी उथैं भि सरकारल खतम कैरि याली। उन्न ब्वाळ कि सरकार हमथैं छकौणा कु (धोखा) काम करणि च।

दूसर तरफ कोटद्वार मा भि आज बड़ि संख्या मा ज्वानु न अग्निपक्ष योजना क खिलाफ दिखौण (प्रदर्शन) कायी। तहसील मा जमा हूंया ज्वानुन केन्द्र सरकार अर भाजपा क खिलाफ खूब नाराबाजी कायी। उन्न ब्वाल कि ई योजना ळ ज्वानु क भविष्य क दगड़ा मा खिलवाड़ च। चार साळ के नौकरि करणा का बाद हमरि जिंदगि मा अंध्यरू हि अंध्यरू ह्वै जाळु।