चम्पावत उपचुनाैं, कांग्रेस न अपड़ा घुंडा भुंय्यां मा टिकैं दीं

चम्पावत उपचुनौं मा धामी समणि मुख्यमंत्री क कुर्सी बचौंण क त कांग्रेस थैं प्रदेस मा अपड़ि पछ्याण थैं औरि कटकुटु करणा कु मौका छायीं। लेकिन प्रदेस के मुखिया धामी के समणि कांग्रेस पार्टी न निर्मला गहतोड़ी थैं खडु कैकि धामी क जीत थैं पक्कु कैरि द्यायी। कांग्रेस हाई कमान क ये फैसला पर सवाल खड़ा हूंण छन। अर राजनीतिक जणगुरूवों मा या छुईं बत्था हूंणि बैट्ठिी ग्यीं बल क्या कांग्रेस पार्टी न चुनौ से पैलि हि अपड़ि हार मानि याली। कांग्रेसियों थैं या आस छायीं कि चम्पावत उपचुनौं मा पुष्कर धामी थैं कांग्रेस क तरफ बटि कड़ी टक्कर मिललि। लेकिन कांग्रेस न चम्पावत सीट मा निर्मला गहतोड़ी थैं टिकट दे कैकि सब्यौं थैं झक्क (चकित) कैरि दें।

यख अच्छि बात या च कि कांग्रेस पार्टी न पैलि बार चम्पावत बटि ब्यटुला थैं चुनौं क मैदान मा उतारि। निर्मला गहतोडी राजनीति मा कुईं बडु नाम नि च। निर्मला गहतोड़ी ग्राम प्रधान बटि चम्पावल जिला पंचायत अध्यक्ष पद पर पौंचि।

चम्पावत बटि कांग्रेस पार्टी थैं धामी क समणि कुईं कटकुटु (मजबूत) प्रत्याशी मैदान मा उतरिक चुनौती दैंण छायी। लेकिन कांग्रेस न निर्मला गहतोड़ी थैं टिकट दे कैकि सवाल हि खड़ा कैरि दीं। सवाल बल इन्ना कि क्या धामी क समणि कुई कटकुटु कांग्रेसी चुनौं लड़ना खूंणि त्यार हि नि छायीं? सवाल महेश खर्कवाल पर भि छन कि आखिर किलै महेश खर्कवाल उपचुनौं लड़णा खुंणि त्यार नि छायीं। सवाल यों भि च बल क्या कांग्रेस मा अबि भि गुटबाजी च। त दुसर तरफ निर्मला गहतोड़ी खूंणि ब्वलें जांद कि व्यीं पर अबि कै भि गुटकु ठप्पा नि लग्यूं च। सदै ईं कारण च कि कांग्रेस न चम्पावत चुनौं मा निर्मला गहतोड़ी थैं टिकट द्यायी।

कांग्रेस प्रदेस अध्यक्ष करन माहरा, नेता प्रतिपक्ष यशपाल आर्य, उपनेता भुवन कापड़ी ब्वलणा छन कि चम्पावत चुनौं क निर्मला गहतोड़ी क दगड़ा मा छौ अर चुनौं मा धामी थैं कड़ी टक्कर द्यौंळा।

बस अब या देय्खणि वलि बात च निर्मला गहतोड़ी मुख्यमंत्री धामी समणि कतगा टकटकि (मजबूती) ह्वै कैकि खडी़ रैन्द अर कांग्रेस पार्टी क बड़ा नेता निर्मला गहतोड़ी क कतगा मदत करदि। लेकिन या बात त साफ च बल चम्पावत उप चुनाैं मा कांग्रेस न धामी क अगनै पैलि हि अपड़ा घुंडु भुंय्यां मा टिकैं दीं।