देरादूण नगर आयुक्त क दप्तर मा धरना पर बैठीं पार्षद
देरादूण मेयर क दगड़ा मा ह्वै घरपोळ के मामला मा अबि तक कुई कारवै नि हूंण से रूस्यां सभासदौंन आज नगर आयुक्त मनुज गोयल के दप्तर मा धरना द्यायी। सभासदौंन टक लगैकि बोलि कि निगम प्रबंध पार्क बटि अबि सोनिया आनन्द नौ कु बोर्ड थैं हट्यें ज्यां।
नगर आयुक्त न बोलि कि पारकाकि एनओसी खतम ह्वै ग्यायी। इन्न मा वख जलदि निगमा कु बोर्ड लग्यें जाळु।
सभासदौंन गूंज संस्था क अध्यक्ष सोनिया आनन्द के खिलाफ भि नारा बाजी कायी। सभासद अमिता सिंह न बोलि कि सोनिया आनन्द अर ऊंका दगड़ियों यू भुलि ग्यीं अर देरादूण के पैळु नागरिक के दप्तर मा नपड़क (बिना बुलाये) चलिग्यीं अर घपरोल सुरू कैरि द्यायी। सभासदौंन बोलि निगम मा इन्न गुण्डागर्दी नि चलालि।
ऐ मौका फर सभासद कमल थापा, संजय नौटियाल, संजीव मल्होत्रा भूपेंन्द्र कठैत अर औरि सभासद भि मौजुद छायीं।