सशस्त्र सीमा बल क दीक्षांत समारोह मा ह्वीं शामिल मुख्यमंत्री अर ब्वाल कि तन, मन व धन से देस के रक्षा करयां

देरादूण। मुख्यमंत्री पुष्कर सिंह धामी आज श्रीनगर मा केन्द्रीयकृत प्रशिक्षण केंद सशस्त्र सीमा बल क दीक्षांत समारोह पौंणा (अतिथि) भाग ल्यायी। मुख्यमंत्री न पासिंग आउट परेड के सलामी ल्यायी। परेड मा 278 ज्वानु न मुख्यमंत्री क समणि देस सेवा करणा क कसम भि खायी।

मुख्यमंत्री न बोलि कि प्रशिक्षण लिंणा क बाद ज्वान अब भारतीय सशस्त्र बल क हिसा बणग्यीं। उन्न ज्वानु थैं बधै दे अर ब्वालि कि तन, मन व धन से देस के रक्षा करयां। उन्न बोलि कि देस क कैर (सीमा) पर रैंण वला रैवासी भि सुरक्षाबळु क तरौं हि एक सिपै बणिक अपणु जिमेबरि थैं निभाणा रन्दन।

मुख्यमंत्री न बोलि कि शहीदु थैं नमन करदु जौन देस के रक्षा मा अपडु बलिदान द्यायी। उन्न बोलि कि बॉर्डर पर खड़ा ज्वानु क कारण हि हम अपड़ा घार मा आराम से रौंदन।

मुख्यमंत्री न बोलि कि मिथैं गर्व च कि एसएसबी क ज्वान प्रदेस के कैर (सीमा) क रखवळि क दगड़ दगड़ा अपड़ि जिमेबरि थैं भि बौत अच्छी तरौं निभौन्दन। उन्न बोलि कि एसएसबी क ज्वानु न कोरोना काल अर चुनौं क बगत मा बौत अच्छु काम कायी।

सशस्त्र सीमा बल के दींक्षात समारोह मा ओवर ऑल बेस्ट प्रशिक्षु क ईनाम सचिन सैनी थैं दियें ग्यायी।

आज 278 जवान मा बिहार के 94, उत्तर प्रदेश क 74, मध्यप्रदेश क 44, उत्तराखंड क 24, राजस्थान क 21, जम्मू कश्मीर क 20, दिल्ली क 01 ज्वानु न 44 हफते क ट्रेनिंग क बाद देस क सेवा करणा क कसम खायी।

ऐ मौका पर उच्च शिक्षा मंत्री डॉ. धन सिंह रावत, जिलाधिकारी डॉ .विजय कुमार जोगदण्डे, एसएसपी यशवंत सिंह चौहान, एसएसबी महानिरीक्षक रतन संजय, उप महानिरीक्षक सृष्टि राज गुप्ता अर सैन्य अधिकारी मौजूद छायीं।