चंपावत बटि चुनौं लड़ळा पुष्कर सिंह धामी, चंपावत सीट इतगा असान नि च जतगा दिख्येणि च

चंपावत के विधायक कैलाश गहतोड़ी ने आज अपडु इस्तीफा विधानसभा अध्यक्ष ऋतु खण्डूडी थैं देद्यायी। कैलाश गहतोड़ी क इस्तीफा क बाद या त साफ ह्वै ग्यायी कि मुख्यमंत्री धामी अब चंपावत बटि चुनौ लड़ळा।

कैलाश गहतोड़ी सब्यौं से पैलि मुख्यमंत्री खूंणि अपड़ि विधानसभा सीट छ्वड़ खूंणि त्यार छायीं। मुख्यमंत्री क भि पैळि पंसद चम्पावत सीट हि छायीं, तबि त दूबरा मुख्यमंत्री बणणा क बाद धामीन पूर्णागिरी धाम, बनबसा, टनकपुर जैकि वखक मनखियों जिकुड़ि थैं टटौळणा क कोसिस कायी। अर अपड़ि जिकुड़ि क बात थैं भाजपा हाईकमान थैं भि बतै। उन्न भि चम्पावत विधानसभा खटीमा से लगि च जै कारण चम्पावत विधानसभा सीट थैं धामी खूंणि सुरक्षित मनें जाणी च।

चम्पावत विधान सभा मा मतदाताओं क संख्या 95,948 च। जैमा आदिम मतदाताओं की संख्या 50,016 अर ब्यटूलों क संख्या 45,932 च। चम्पावत मा भाजपा अर कांग्रेस हि द्वी दल छन जौंक बीच मा हि चुनौ क मुकाबळा हूंद।

उत्तराखंड बणणा क बाद चम्पावत विधानसभा सीट मा साल 2002 से 2017 तक भाजपा कबि भि कै भि प्रत्याशी थैं दुबरा टिकट नि द्यायी त कांग्रेस न चुनौं मा हमेसा हेमेश खर्कवाल वा हि भरोसु कायी।

साल 2002 मा कांग्रेस क हेमेश खर्कवाल न चुनौं जीति। त साल 2007 में बीना महराना चम्पावत बटि विधायक बणि। भाजपा न साल 2012 मा ऊंकू टिकट थैं काटि द्यायी अर हेमा जोशी थैं टिकट दे द्यायी। भाजपा तिसर नम्बर पर फिसळि ग्यायी। अर कांग्रेस क हेमेश खर्कवाल 20,310 बोटु से चुनौ जीति ग्यी।

त साल 2017 क चुनौ मा कैलाश गहतोड़ीन कांग्रेस क हेमेश खर्कवाल थैं 17,360 बोटुळ हर्रे छायीं। 2022 मा चम्पावत मा कुल कुल 50.26 प्रतिशत बोट प्वड़िन। भाजपा क कैलाश गहतोड़ी न कांग्रेस क हेमेश खार्कवाल थैं 5304 बोटु न हर्रे द्यायी। ईं यू कारण च भाजपा के लोगु हि सवाल उठाणा छन। उन्न भि कैलाश गहतोड़ी 2022 विधानसभा चुनौं मा भितरधात क आरोप लग्यें छायी।

2022 चुनौं मा भाजपा पुष्कर सिंह धामी मुखड़ि थैं लेकैकि हि चुनौं क मैदान मा छायीं। क्या ह्वै सबि जणदा छन, धामी खटीमा विधानसभा सीट बटि चुनौ हारि ग्यीं। चम्पावत सीट खटीमा बटि लगिं च। इलै हि धामी थैं औरि भि चंट (सर्तक) रैंण प्वड़ळु। साफ च चम्पावत क सीट धामी खूंणि इतगा असान नि च जतगा दिख्येणि च।