रवांई-जौनसार तोक मा लोक संस्कृति कि अपड़ि अलग हि पछ्याण च: मुख्यमंत्री

देरादूण। मुख्यमंत्री पुष्कर सिंह धामीन आज उत्तरकाशी क जखोला सोमेश्वर मंदिर मा हूंण वलु कौथिग बिसू क शुभारम्भ कायी।

ऐ उर्या कार्यक्रम मा मुख्यमंत्रीन बोलि कि कौथिगों कु महतव धर्म अर आस्था क दगड़ा-दगड़ि लोक संस्कृति अर संवर्धन से भि जुड्यूं च। उन्न बोलि कि रवांई-जौनसार तोक मा लोक संस्कृति कि अपड़ि अलग हि पछ्याण च।

मुख्यमंत्री न बोलि कि प्रधानमंत्री नरेन्द्र मोदी न नेतृत्व मा सर्या देस कु विकास हूंण च। उन्न ब्वाल कि प्रधानमंत्री क जन्न स्वचणा छन उन्नि हि उत्तराखण्डों विकास हूंण च। अर पुरोला क रैवासियों न या फर अपड़ि मोर लग्यें द्यायी। मुख्यमंत्री न पुरोळा क रैवासियों क आभार जतै। मुख्यमंत्री बोलि कि द्वी साल बटि कोरोना क कारण चारधाम जात्रा नि ह्वै साकी। लेकिन ऐसु क साळ जात्रा बौत बड़ा स्तर पर ह्वैळी। या खूंणि सरकारन अपड़ि पूरी त्यारि कैरि याली।

मुख्यमंत्री न ब्वाल कि हम अतिथि देवा भवः क स्वोच थैं लेकैकि काम करणा छा। ऐसु का साळ चारधाम जात्रा मा आण वला जात्रियों थैं कै भि प्रकार से कुई असुविधा नि हूंणि चैंद। उन्न ब्वाल कि 21 वीं सदी अर तिसरू दशक उत्तराखण्डकु दशक ह्वालु। जैमा हम सबि उत्तराखण्डियांे थैं अपड़ु योगदान देंणु प्वडळु। मुख्यमंत्री न ब्वाल हमरि सरकाळ जू वादा जनता दगड़ मा कर्या छायी वैंथै पूरू कर्यैं जाणु च। प्रदेस मा समान नागरिक संहिता थैं लैकेकि ड्राफ्ट त्यार करै जालु, जै खूंणि एक कमेटी बण्यें जाली। उन्न ब्वाल कि हमन बूढ़यों का पिन्सन थैं बण्यें याली अर द्विया बुढ़-बुढ़यौं थैं पिंसन दियें जाणा कु शासनादेश भि जारी ह्वैगे। उन्न ब्वाल कि राज्य आन्दोलनकारियों क भि फ्री इलाज खुंणि भि शासनादेश जारी ह्वैगे।

मुख्यमंत्रीन घोषणा कायी कि पुरोला अर वैंका इन्न-फुन्ने क तोकु थैं बागवानी क्षेत्र घोषित करणा क सरकार प्रयास करणि च। उन्न ब्वाल कि स्व. बर्फिया लाल जुवांठा सामुदायिक स्वास्थ्य केन्द्र थैं उप जिला चिकित्सालय मा उच्चिकृत करै जालु।

ऐ उर्या कार्यक्रम मा विधायक पुरोला दुर्गेश्वर लाल, भाजपा जिला अध्यक्ष रमेश चौहान भाजपा प्रदेश मीडिया प्रभारी मनवीर चौहान, बिसू मेला समिति (जखोल) क अध्यक्ष गंगा सिंह रावत समेत वखक रैवासी छायीं।