रूस्याँ कांग्रेस विधायकों कि दल बदलणा कि खबर

देरादूण। उत्तराखण्ड कांग्रेस मा कुछ भि ठीक नि हूंणु च। विधान सभा चुनौं मा हरणा क बाद कांग्रेस मा लगातार गुटबाजी समणि आणी छायी। लेकिन कांग्रेस न जन्नि प्रदेस मा नै प्रदेस अध्यक्ष, नेता प्रतिपक्ष क जन्नि घोषणा कायी। जैका बाद कांग्रेसक घौर क भितरा क लडै़ अब भैर ऐग्यायी।

बतै दिंया क कांग्रेसन न यशपाल आर्य थैं नेता प्रतिपक्ष अर करन माहरा थैं प्रदेस अध्यक्ष क्या बण्यें कि कांग्रेस के भितर के लड़ै समणि ऐग्यायी। प्रीतम सिंह गुट न खुल कैकि नै प्रदेश अध्यक्ष अर नेता प्रतिपक्ष कु विरोध शुरू कैरि द्यायी।

नेता प्रतिपक्ष के दौड़ मा हरीश धामी, राजेन्द्र सिंह भण्डारी अर प्रीतम सिंह छायीं। अर जन्नि यशपाल आर्य कु नौ के घोषण ह्वै उन्न गढ़वाल मण्डल मा रूस्याँ कांग्रेसियोंन इस्तीफा देंणा शुरू कैरि दीं।

यशपाल आर्य थैं नेता प्रतिपक्ष बण्यें जाणा क बाद 10 कांग्रेसी विधायक रूस्यां छन। इन्न मा अजै सर्या दिनमान कांग्रेस क 10 विधायकों क दलबदल करणा क खबर राजनीतिक तवा मा खूब सिकेंणि छायी। अर या चर्या तरफि या चरचा हूंणि छायी कि कांग्रेसक रूस्यां 10 विधायक भोळ देरादूण मा एक बैठक कारला। जैका बाद हि दलबदलक खबर चरया तरिफ फैळि ग्यायी। हालांकि कांग्रेस संगठनळ विधायकों क दलबदल क छुईंयों थैं अफवा हि बतै।

लेकिन या बात साफ च कि कांग्रेस हाई कमानन प्रदेस क तीन बड़ा पदु पर कुमाऊँ थैं जन महतव द्यायी वै से गढ़वाल मंडला क विधायक रूस्याँ छन।

वांका बाद नेता प्रतिपक्ष यशपाल आर्य प्रीतम सिंह क घौर मा पौंचि ग्यीं। प्रीतम सिंह न उथैं फूळु कु गुलदस्ता दे कि ऊंकू आवा भगत कायी। द्वियां नेताओंन क ईं भेंट थैं विधायकोंकु विरोध से जोड़िक दिय्खें जाणु च। प्रदेस मा कांग्रेस अध्यक्ष, नेता प्रतिपक्ष क दगड़ा मा नै उप नेता प्रतिपक्ष बण्यें जाणा से प्रीतम सिंह भि पार्टी से रूस्यां छन। यशपाल आर्य अर प्रीतम सिंग क बीच मा हूईं छुईंयों क बाद हि ये बातकु मतलब निकळे जाणु च कि रूस्यां विधायकु थैं मनौंणा मा अब कांग्रेस क नेता लगि गैन।