गुटबाजी क आरोप से रूस्यां प्रीतम सिंग न ब्वाल-आरोप सै ह्वाला म मिं राजनीति छोड़ द्यूळू
चुनौं क परिणाम अयां एक मैना ह्वै ग्यायी अर कांग्रेस विधानसभा चुनौं मा अपडि हार थैं अबि तक पुटगा मा नि पचैं साकी। कांग्रेस पार्टी यू उमाल अब भैर आण बैट्ठि ग्यायी।
गुटबाजी के आरोपुळ परेसान ह्यां कांग्रेस पार्टी के विधायक प्रीतम सिंह न आज एक बडु बयान द्यायी। प्रीतम सिंह न अपड़ा बड़ा नेताओं पर निसाणा लग्यें कि ब्वाल कि ऊथैं लेकैकि जन बयान दियें जाणा छन वैकी हाईकमान थैं जांच करण चैंद। अगर आरोप सै ह्वाला म मि राजनीति छोड़ द्यूळू।
बतै दियां कि कांग्रेस संगठन महामंत्री विष्णु गोपाल अर प्रदेस प्रभारी देवेन्द्र यादव न बोलि छायीं कि प्रीतम सिंह क गुटल विधान सभा चुनों मा सहयोग नि कायी जै कारण से कांग्रेस थैं कै सीट्यिों मा नुकसान ह्वै।
अप्फ पर लग्यां ऐ आरोप पर आज प्रीतम सिंह न पलटवार कायी। प्रीतम सिंह न ब्वाल कि जौ लोगु क गुटबाजी क कारण कांग्रेस हारि च उ सै कुईं किलै सवाळ नि पुछणु च।
प्रीतम सिंह न ब्वाल कि मिं पर आरोप मिथैं बदनाम करणा खूंणि लग्यें जाणा छन। उन्न ब्वाल कि मिंन पार्टी क कै भि प्रत्याशी खिलाप कभि भि कुई छुईं बत्था नि बोलि। उन्न ब्वाल कि मिंन अगर कै खूंणि भि कुछ ब्वाल त सबूत दिखावा। तब मिं फर लग्यां आरोप सै हूंदि, त मिं राजनीति छोड़ द्यूळू।
प्रीतम सिंह न हाईकमान से भि जांच करणा मांग कायी।
अप्फ पर लग्यां आरोप से रुस्यां प्रीतम सिंह न ब्वाल कि इन्न आरोपु क जांच हूंण चैंद अर दूद कु दूद अर पाणि कु पाणि हूंण चैंद। उन्न ब्वाल कि चकरौता के जनता न वूथैं विधान सभा मा भेजी, अब मिथैं ऊं खूंणि काम करण।