अपड़ों के बीच मा हि कखि हरची ग्यायी न्यूं साल (नव संवत) . . .

विक्रम संवत क शुरुवात चैत्र शुक्ल प्रतिपदा बटि हूंद। ऐसु क साल 2 अप्रैल 2022 बटि नव संवत् 2079 शुरू हूंणि च। नव संवत् माने हमरू हिन्दु धरमाकु नै साल।

लेकिन न बजार मा कुई चहल-पहल च अर न ज्वान नौंना मा कुईं मतंग अर न नै सालक आणा क कुईं खुशी हि च। ईं स्वचण वळि बात च कि अंग्रेजी क नै साल क पैलि दिन मा क्या हूंद? अंग्रेजी क नै साल मा बजार अर होटलु मा त्यारी रैंद त ज्वान नौंनों क मतंग क बात हि कुछ औरि हूंद वु अद्दा राति तक नचणा गाणा रन्दिन।

एक नै साल वो च जू हमथैं अंग्रेजी विरासत मा मिल्यूं च अर एक नव संवत् जै थैं हम भुलदा जाणा छन। अंग्रेजी आज भि हमसे अगने हि च। आज अंग्रेजीक नै साल मा हमरा देस मा करोड़ों रुपयों कु धन्धा (व्यापार) हून्द। त दूसर तरफ नव संवत् क शुरूआत केवल मंदिर मा पूजा पाठ तक हि रै ग्यायी।

नव संवत् के शुरूआत नवरात्र दिन बटि हूंद। अर ईं बात च मंदिर मा हूंण वलु पाजू पाठ हमथैं बतै देंन्द कि नव संवत् ऐग्यायी। नथर नै पीढ़ी थैं त पता भि नि च नव संवत् क्या च अर कै चखुळा कु नौं च? अब यामा नै पीढ़ी कखि मा भि गलत नि च, यख मा गलत हम छा। कारण च जन्नि हमरू नौन्याळ थ्वड़ा बडु़ होन्दू त हम वैथैं प्रणाम करणा क जगा मा हैलो-हाय अर गुड मार्निग सिखौन्दन। अपड़ा नौन्यिाळों थैं अंग्रेजी इस्कूल मा पढ़ाणु हमरू स्टेटस सिंबल बणि ग्यायी। अब बच्चा त वी सिखळु जु वैथैं सीखयें जाळु।

अंग्रेजी नै साळ अर हमरू नव संवत् मा कतगा फरक च कि नव संवत् क दिन मंदिरों मा ओऽम सुणें दिन्द त अंग्रेजी नै साल मा चौछ्ड़ि कन्दूण फ्वड़न वळु ह्लला हि ह्लला हूंद। अंग्रेजी नै साल पर सड़क्यिों मा शराब क नशा मा सर्या राति नचणु यू बतान्द कि हमरा नौन्यिाल अपड़ि संस्कृति से कतगा दूर ह्वै ग्यायी। दूसरा क संस्कृति अपणाण मा कुई बुरे नि च लेकिन अपड़ि संस्कृति क कीमत पर त कतै न। अंग्रेजी नै साल अर हमरू नै साल द्वियों मा फरक साफ च अंग्रेजी नै साळ थ्वड़ा देर कु धपरोळ च नव संवत् हमथैं खुशी अर मतंग कु अहसास करान्दु।

आप सब्बियों थैं नव संवत् 2079 मंगलमय हो, बौत-बौत शुभकामनाओं क दगड़।