कांग्रेसळ कायी बोटुक गिनती से पैळि मंथन, हाईकामन भि चटक ह्वै ग्यायी

देरादूण। 10 मार्च खुंणि वलि मतगणना अर वैका बाद क्या हूंद। ईं समस्या से निपटणा खूंणि कांग्रेसन अपणि त्यारि तेज कैरि द्यायी। देरादूण क एक होटळ मा आज कांग्रेस पार्टी न एक बैठक कैकि चिन्तन अर मनन का। बैठक मा केन्द्रीय पर्यवेक्षक दीपेंद्र हुड्डा अर कांग्रेस का सब्बि बड़ा नेता मौजूद छायी।

ब्याली अय्यां एग्जिट पोळ क बाद उत्तराखण्ड मा या बात साफ ह्वै ग्यायी कि कि 2022 सत्ता क लडै़ मा भाजपा अर कांग्रेस मा टक्कर च। ईं यू बड़ु कारण च कि कांग्रेस हाईकामन भि चटक ह्वै ग्यायी। इन्नु पैळि बार ह्वै जब कांग्रेस पार्टी कुईं पर्यवेक्षक चुनौं से पैळि उत्तराखण्ड मा पौंचि।

कांग्रेस थैं सत्ता मा आणा क पूरि उम्मीद च। लेकिन कांग्रेस थैं ईं बातकि डैर भि च कि भाजपा मतगणाना मा कखि कुईं खेल नि कैरिदे। कांग्रेस पैळि बटि हि बार-बार पोस्टल मतों मा घपरोळ हूंणा क बात करणि च।

कांग्रेस क नेतों क ब्वलण च कि भाजपा कुईं भि अर कै भि स्तर तक घपरोळ कैरि सकदि। ईं यूं बड़ु कारण च कि कांग्रेस ई बार भाजपा के हर सवाळकु जबाव दिंणा खूंणि त्यार च।

कांग्रेस न बतै कि आजै बैठक मा जीतण वळा विधायकों कि सुरक्षा अर बोटुक गिनती मा रखण वली सावधानी पर चिंतन मनन ह्वायी अर चुनौं मा आणा वला परिणाम पर चर्चा ह्वायी।

बैठक मा पैल्यक मुख्यमंत्री हरीश रावत, नेता विपक्ष प्रीतम सिंह अर प्रदेश अध्यक्ष गणेश गोदियाळ सब्बियों ने कांग्रेस क जीतकु दावा कायी अर ब्वाळ कि प्रदेस मा सत्ता मा बदलाव हूंणू च।