यूकेडी क मोहित डिमरी न अप्फि कै छायीं अप्फुं पर हमळा, जांच मा ह्वै या बाद साफ

दून। उत्तराखण्ड विधान सभा चुनौं मा 12 फरवरी क रात्रि रूद्रप्रयाग मा रूद्रप्रयाग बटि यूकेडी का प्रत्याशी मोहित डिमरी पर हुयां हमळा थैं पुळिस न झुट्ठु बतै द्यायी। पुलिस न ब्वाळ कि चुनौं मा अपडु़ फैंदा खूंणि मोहित डिमरी यू प्रपंच त्यार कैरि छायीं। पुळिस न ब्वाळ कि ऐ मामळा मा भारतीय दंड संहिता क धारा 182 मा अगने कारवै करै जाळी। त वखि ऐ मामळा मा मोहित डिमरी न घटना क सीबीआई जांच करणा क मांग कायी।

पुळिस न अपड़ि रिपोर्ट मा ल्याख कि चुनौं मा अपड़ा फैदा खूंणि मोहित डिमरी न अप्फि हमळा थैं अंजाम द्यायी। पुळिस न ब्वाळ क 12 फरवरी खूंणि जवाड़ी बाईपास मा मोहित डिमरी न पैळि अपड़ि गाड़ी थैं डुंगा मारिक त्वाड़ अर वैका बाद अप्फि अप्फु थैं भि चोट लग्यें दीं।

पुळिस अधीक्षक न बतै कि जब पुळिस मौका पर गायीं त वखम मोहित अर वैका दगड़यां नि छायीं। उन्न ब्वाळ कि हमळा क सर्या जाणकारी झूट्टि च। पुळिस अधीक्षक न ब्वाळ कि ऐ मामळा मा विवेचना पूरि कैरि याळी। जै मा साफ साफ या बात समणि आणि च कि यूकेडी क प्रत्याशी पर हमळा क जाणकारी झुट्टि च, ऊं पर कुईं हमळा नि ह्वायीं।

उन्न बतै कि सीसीटीवी अर फोन क जाणकारी मा भि यां बात साबित नि ह्वै।

एसपी न बतै कि मामळा मा आईपीसी क धारा 182 मा कारवै कैरिक रिपोर्ट कोट थैं भेज्यें जाणी च।

दूसर तरफ यूकेडी क प्रत्याशी न पुळिस पर सत्ता क दबाव मा काम करणा क आरोप लग्यें। अर ब्वाळ कि बिना म्यारा ब्यान ळिंया पुळिसन विवेचना पूरि कैरि द्यायी जु गळत च। उन्न ऐ मामळा मा सीबीआई से जांच करणा खूंणि राष्ट्रपति थैं चिट्ठी ल्यखणा क बात भि ब्वाळ।