उत्तराखण्ड क्रान्ति दल 2022 चुनौं मा चुनौती कम नि छन

राज्य बणाणा मा बडि भूमिका निभाण वळु उत्तराखण्ड क्रान्ति दल क समणि अबक दा विधान सभा चुनौं मा अपणा घार मा हि चुनौं जितणा क बौत बड़ि चुनौती च।

बता कर्यां त कुमाऊं मण्डळ मा द्वाराहाट सीट राज्य बणाणाा क बाद दस साळ तक उक्रांद मा रायीं। त डीडीहाट अर गढ़वाळ मा देवप्रयाग सीट भि उत्तराखण्ड क्रांन्ति दळ क मजबूत गढ़ मन्यें जांद।

उक्रांद ने द्वाराहाट विधानसभा बटि पुष्पेश त्रिपाटी थैं चुनौं मैदान मा उतरियूं च। द्वाराहाट उक्रांद को जन्मदाता सदस्य विपिन त्रिपाठी क जन्म अर कर्मभूमि च। साळ 2002 मा विपिन त्रिपाटी न यख बटि चुनौ लणि अर जीत हासिळ कायी। उन्न कांग्रेस क पूरन चन्द्र थैं हर्रैं। लेकिन 2004 विपिन त्रिपाटी कु स्वगवार्स ह्वै ग्यायी। जैका बाद ऊंकी विरासत थैं ऊंका नौंना पुष्पेश त्रिपाठी न सम्भाळ अर 2005 मा उप चुनौं मा जीत हासिळ कायी। 2007 चुनौ मा भि पुष्पेष त्रिपाठी न जीत हासिळ कायी। वैका बाद य सीट एकदा कांग्रेस अर एकदा भाजपा मा रायीं।

डीडीहाट भि कुमौं मा उक्रांद कु गढ़ च। यख बटि यूकेडी क केन्द्रीय अध्यक्ष काशी सिंह ऐरी तीन बार विधायक रैंया। काशी सिंह न 1985, 1989 अर 1993 मा यख बटि चुनौं जीति। राज्य बणणा क बाद 2002 मा डीडीहाट थैंं द्वी हिससों मा बाटें ग्यायी। जैका कारण नैं सीट कनाळी छीना खतम ह्वैग्यायी। डीडीहाट और कनाळीछीना सीट पर चार बार क विधायक काशी सिंह ऐरी अबक दा चुनौं नि लड़ना छन। ईं सीट मा यूकेडी क गोविन्द सिंह बसेड़ा चुनौं मैदान मा जम्यां छन।

येका अळावा गढ़वाळ मा देवप्रयाग सीट बटि 2007 अर 2012 मा यूकेडी क दिवाकर भट्ट विधायक रैं। दिवाकर भट्ट अबक दा भि ईं सीट बटि चुनौं मा अपड़ु भाग्य अजमाणा छन। अब या देय्खण वळि बात च कि यूकेडी अपड़ा गढ़ू मा कन कैकि अपड़ि नाव थैं पार लगान्द।

त दूसर तरफ राज्य आन्दोळन मा बड़ि भूमिका निभाणा वळु क्षेत्रीय दळ उत्तराखण्ड क्रान्ति दळ थैं 2022 चुनौं मा केवळ अर केवळ 48 प्रत्याशी खड़ा करण पर भि सवाळ हूंण छन।