रूस्यों थैं मनौंण, भाजपा खूंणि च बड़ी चुनौती
देरादूण। 2022 विधानसभा चुनाैं में ‘अब की बार 60 पार’ क ‘धै’ लगौंण वळि भाजपा क अपड़़ों नि हि मुस्किळ बढ़ैईं च।
प्रदेस मा लगभग द्वी दर्जन से जादा सिट्यूं मा भाजपा क भितर हि बगावत हुईं च। जैमा 15 से 16 सिट्यू मा भाजपा क अपड़ों ने पार्टी क घोषित प्रत्याशी खिलाफ हि नामांकन कैरिक पार्टी के समणि एक संकट पैदा कैरि द्यायी। अब भाजपा के समणि या बौत बड़ि चुनौती च रूस्यों थैं कन कैकि मनादि।
राजधानी देरादूण क धर्मपुर सीट मा भाजपा क विनोद चमोळी भाजपा क प्रत्याशी छन। ईं सीट बटि टिकट नि मिळण से रूस्यां बलवीर सिंह पंवार निर्दळीय मैदान मा छन। बलवीर पंवार विनोद चमोळी पर पांच साळु मा कुछ भि काम नि करणा कु आरोप लगाणा छन। अर चुनौं मैदान मा चमोळी थैं चुनौती दिंणा छन।
वखि कैंट सीट मा जख भाजपा न दिवंगत हरबंस कपूर क घरवळि सविता कपूर थैं टिकट द्यायी जैंका खिलाफ दिनेश रावत ऊथैं चुनौती दिंणा छन।
रायपुर बटि भाजपा के विधायक उमेश शर्मा काऊ चुनौं मा ताळ ठ्वकणा छन। लेकिन भाजपा क हि एक गुट बौत पैळि बटि हि ऊंकू विरोध करणु च। साफ च रायपुर मा काऊ रस्ता आसान नि हूंणि वळु।
डोईवाळा बटि आखिर बगत मा भाजपा न बृजभूषण गैरोळा थैं टिकट त दे द्यायी लेकिन डोईवाळा बटि भि ऊंकी मुसिकळ कम नि हूंणि छन। जितेन्द्र नेगी, सुभाष भट्ट अर सौरभ थपळियाळ क बगावत ऊं पर भारि पौड़ि सकद।
घनसाळी सीट मा भाजपा प्रत्याशी थैं सोहन लाळ अर दर्शन ळाळ क बगावत भारि प्वड़नि च।
धनोल्टी सीट मा प्रीतम पंवार थैं महावीर रांगड़ क चुनौती से मुंडरू ह्यूं च।
यमुनोत्री सीट मा भाजपा क जगबीर सिंह भण्डारी भि पाटी क प्रत्याशी खिलाफ हि बिगुळ बज्यूं च।
त कोटद्वार सीट मा भाजपा क धीरेंद्र चौहान ने ऋतु खण्डूडी अर भाजपा क मुण्ड मा मुन्डरू कर्यू च।
वखि रूद्रपुर सीट मा विधायक राजकुमार ठुकराळ निर्दळीय मैदान न छन अर भाजपा थैं सबक सिखाणा क बात ब्वळण छन।
कर्णप्रयाग, किच्छा मा भि भाजपा उम्मीदवारू थैं अपड़ों क हि विरोध झय्ळण प्वड़नु च त रामनगर अर काळाढूंगी मा भाजपा नेतायूं क बगावत से भाजपा मुण्ड मा चिंता क लैन च।
याका बाद भि भाजपा पार्टी ब्वळणि च कि कुईं बगावत नि च अर रूस्यों थैं मनौंण क बात करणि च। लेकिन पाड़ बटि सैंण (मैदान) तक भाजपा मा बगावत क आग फैळि च।
अब यू त बगत हि बताळू कि भाजपा कन कैकि रूस्यों थैं मंनादिं , अब्बि त भाजपा खूंणि या हि सबसे बड़ि चुनौती च।