नरेन्द्रनगर विधानसभा, ओम गोपाळ न बढ़ैं द्यायी सुबोध उनियाळ कु मुन्डरू

भाजपा नेता व पूर्व विधायक ओमगोपाल रावत न कांग्रेस कु हत्थ क्या थामी कि कांग्रेस न झट ऊंक हत्थ मा नरेन्द्र नगर बटि टिकट थमें द्यायी। जैका बाद नरेन्द्र नगर सीट मा भाजपा का सुबोध उनियाळ कु मुन्डरू बढ़ि ग्यीं।

ओमगोपळ रावत बौत बगत बटि पार्टी से रूस्यां छायीं। भाजपा न जन्नि नरेन्द्र नगर सीट बटि सुबोध उनियाळ कु टिकट क्या फैनळ कायी। ओम गोपाळ न पार्टी छव्ड़न कु ऐळान कैरि द्यायी। 26 जनवरी खूंणि कांग्रेस क प्रदेश अध्यक्ष गणेश गोदियाळ न ओमगोपाळ थैं कांग्रेस मा शामिळ कायी अर नरेन्द्र नगर ऊंका हाथ मा कांग्रेस कु टिकट धैरि द्यायी।

2007 मा ओम गोपाळ न उक्रांद क टिकट मा चुनौं लड़ि तब उन्न कांग्रेस क सुबोध उनियाळ थैं 4 बोट्न हर्रे छायी।

2012 मा सुबोध उनियाळ कांग्रेस क टिकट पर अर ओम गोपाळ रावत भाजपा क फुळ मा बैट्ठया छायीं। तब सुबोध उनियाळ न ओमगोपाळ थैं 401 बोटन हर्रें छायी।

जैंका बाद कांग्रेस बटि बगावत कैकि सुबोध उनियाळन भाजपा कु फूळ थामी। 2017 मा भाजपा क फूळ मा सुबोध उनियाळ न चुनौं लड़ि। त ओम गोपाळ न बगावत कैकि निर्दळीय ताळ ठोक द्यायी। सुबोध पैळु त ओम गोपाळ रावत दुसर नम्बर पर छायीं।

अब 2022 मा गणित उल्टी ह्वैग्यायीं। अब भाजपा क फुळ पर सुबोध उनियाळ त कांग्रेस क हाथ पकड़िक ओमगोपाळ रावत चुनौं मैदान मा एक दूसरा क समणि जम्यां छन?

भाजपा बटि टिकट नि मिलण से रूस्यां ओम गोपाळ रावत चुनौं से पैळि कांग्रेस कु हत्थ क्या थामी कि दंबग ओम गोपाळ थैं कांग्रेस न झट नरेन्द्र नगर बटि टिकट दे द्यायी। कांग्रेस न एकदा दुबरा सुबोध उनियाळ अर ओम गोपाळ थैं अमणि-समणि कैकि नरेन्द्र नगर चुनौं थैं औरि रोचक बण्यें द्यायी।

बतै इन्न जाणु च सुबोध उनियाळ जब बटि भाजपा मा ग्यीं तब बटि पुरणा भाजपा क ळोग ऊथैं उ जगा नि दिंणा छन, जु जगा ऊंकी कांग्रेस मा छायीं। ईं यू बड़ु कारण च कि पुरणा भाजपा अब सुबोध उनियाळ क खिलाफ चुनौं मा माहौळ बणाणा छन।

त वखि जख सुबोध उनियाळ जीत पक्की मन्नें जाणी छायी, वख अब ओम गोपाळ क चुनौं मैदान मा आण से सुबोध उनियाळ अर भाजपा कु मुन्डरू औरि बढ़ि ग्यीं।