टिकट नि मिळण सै नाराज, निर्दळीय मैदान मा आणा खूंणि त्यार

देरादूण। भाजपा न 59 सिट्यों मा टिकटों को घोषणा क्या कायी उन्नि टिकट नि मिळण वळा दावेदारू क बगावती सूर तेज हूंण बैट्ठिग्यीं। पैळि हि दिन 10 से जादा सिट्यूंमा भाजपाक क दूसरा दावेदारू न पार्टी क खिलाफ चुनौ लड़न क संकेत दे दीं। सबसे जादा यमुनोेत्री, गंगोत्री, धर्मपुर, धनोल्टी, थराली, कर्णप्रयाग, नरेद्रनरग मा विरोध जादा च।

यमुनोत्री, गंगोत्री, थराळी अर कर्णप्रयाग मा यू दावेदार जौ थैं टिकट नि मिळि न सोशळ मीडिया मा अपड़ि नाराजगी दिखाणी शुरू कैरि द्यायी।

देरादूण मा सबसे जादा हॉट सीट धर्मपूर मा भाजपा के दूसर नम्बर को नेता बीर सिंह पंवार ने निर्दळीय चुनौं लड़न क घोषणा करै द्यायी। जन्नि भाजपा न टिकटू को घोषणा कायी अर विनोद चमोळी का टिकट फैनळ ह्वै बीर सिंह पंवार क समर्थकों ने एक बैठक कायी अर निर्दळीय चुनौं लड़न कू फैसळा कायी। रूस्यां कार्यकताऊं न विनोद चमोळी पर बौत गंभीर आरोप लग्यें अर ब्वाळ कि 5 साळ तक चमोळी ने विकास क नौ पर कुईं काम नि कायी। यख तक कि प्र्रदेस मा केन्द्र सरकार अर राज्य सरकारू क योजनाओं थैं भि ळागू नि कायी। रूसया कार्यकत्ताओं अर बीरसिंह पंवार ने चमोळी पर विधानसभा क रैवासियों पर उपेक्षा क आरोप भि लग्यें।

नरेन्द्र नगर विधान सभा बटि सुबोध उनियाळ थैं टिकट मिळणा का बाद टिकट क दौड़ मा लग्यां ओमगोपाळ रावत रूस्यां छन। ओम गोपाळ न निर्दळीय चुनौं लड़न क त्यारि कैरि याळी। गंगोत्री सीट मा सूरतराम नौटियाळ चुनौ लड़न खूंणि त्यार छन। त कर्णप्रयाग बटि टिकटाक दावेदार टीका प्रसाद मैखुरी न भि निर्दळीय चुनौ लड़न कु मन बण्यें याळी। उन्न फेसबुक का भाजपा पर धोखा देंणा का आरोप लग्यें। थराळी मा भि मुन्नी देवी नाराज छन। त नैनीताळ बटि सरिता आर्य थैं टिकट मिळना क बाद सै हि भाजपा के हेम आर्य अर महेन्द्र पाळ पार्टी से रूस्यां छन।

भाजपा ने अपड़ा रूस्यां कार्यकताओं थैं मनाणा क जिमेबारी क्षेत्रुक सांसदु क कांधु का डाळि याळी। अब देय्खण वळि बात या च क रूस्यां कार्यकताओं थैं मनौंण मा भाजपा कतगा कामयाब हूंद।